قیس بن زید سے روایت ہے کہ نبی کریم صلی اللہ علیہ وسلم نے سیدہ حفصہ بنت عمر رضی اللہ عنہما کو طلاق دے دی، تو ان کے دونوں ماموں قدامہ اور عثمان جو کہ مظعون کے بیٹے ہیں ان کے پاس آئے، تو وہ رونے لگیں اور کہنے لگیں: ”اللہ کی قسم! آپ صلی اللہ علیہ وسلم نے مجھے کسی برائی یا ناپسندیدہ فعل کی وجہ سے طلاق نہیں دی۔“ اتنے میں نبی کریم صلی اللہ علیہ وسلم تشریف لائے اور فرمایا: ”جبرائیل علیہ السلام نے مجھ سے کہا ہے: آپ حفصہ سے رجوع کر لیں، کیونکہ وہ بہت زیادہ روزے رکھنے والی اور بہت زیادہ عبادت گزار ہیں، اور وہ جنت میں بھی آپ کی زوجہ ہیں۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6906]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے سیدہ حفصہ رضی اللہ عنہا کو ایک طلاق دی، تو آپ صلی اللہ علیہ وسلم کے پاس جبرائیل علیہ السلام آئے اور عرض کی: ”اے محمد! کیا آپ نے حفصہ کو طلاق دے دی ہے حالانکہ وہ بہت زیادہ روزے رکھنے والی اور بہت زیادہ عبادت گزار ہیں، اور وہ جنت میں بھی آپ کی زوجہ ہیں؟“ چنانچہ آپ صلی اللہ علیہ وسلم نے ان سے رجوع فرما لیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6907]