حسین بن ابی حسین سے روایت ہے کہ رسول اللہ صلی اللہ علیہ وسلم نے سیدہ حفصہ رضی اللہ عنہا سے شعبان کے مہینے میں نکاح فرمایا، اور یہ غزوہ احد سے تیس ماہ پہلے کی بات ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6902]

سیدنا عبداللہ بن عمر رضی اللہ عنہما سے روایت ہے، انہوں نے فرمایا کہ سیدہ حفصہ رضی اللہ عنہا کی وفات پینتالیس ہجری کے ماہ شعبان میں ہوئی، اور ان کی نماز جنازہ مروان بن حکم نے پڑھائی جو ان دنوں مدینہ کا گورنر تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6903]

سیدنا عبداللہ بن عمر رضی اللہ عنہما سے روایت ہے، انہوں نے کہا کہ میں نے مروان کو دیکھا کہ اس نے سیدہ حفصہ رضی اللہ عنہا کے جنازے کی چارپائی کو آل حزم کے گھر سے لے کر مغیرہ بن شعبہ رضی اللہ عنہ کے گھر تک دونوں بازوؤں کے درمیان سے اٹھایا ہوا تھا، اور پھر سیدنا ابوہریرہ رضی اللہ عنہ انہیں مغیرہ کے گھر سے ان کی قبر تک اٹھا کر لے گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6904]

سیدنا عبداللہ بن عمر رضی اللہ عنہما سے روایت ہے کہ سیدہ حفصہ رضی اللہ عنہا کی قبر میں (تدفین کے لیے) عبداللہ اور عاصم جو کہ عمر رضی اللہ عنہ کے بیٹے ہیں، اور سالم، عبداللہ اور حمزہ جو کہ عبداللہ بن عمر رضی اللہ عنہما کے بیٹے ہیں، اترے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6905]