محمد بن ابراہیم تیمی اپنے والد سے روایت کرتے ہیں، انہوں نے کہا: سیدنا ابوبکر صدیق رضی اللہ عنہ اپنی وفات تک سیدہ ماریہ رضی اللہ عنہا کے اخراجات برداشت کرتے رہے، پھر سیدنا عمر رضی اللہ عنہ ان کے اخراجات اٹھاتے رہے یہاں تک کہ ان کی خلافت ہی میں سیدہ ماریہ رضی اللہ عنہا کی وفات ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6992]

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم کے صاحبزادے ابراہیم کی والدہ سیدہ ماریہ رضی اللہ عنہا کی وفات محرم سنہ 16 ہجری میں ہوئی، سیدنا عمر رضی اللہ عنہ لوگوں کو ان کے جنازے کے لیے جمع کرتے ہوئے دیکھے گئے، چنانچہ عمر رضی اللہ عنہ نے ان کی نماز جنازہ پڑھائی اور انہیں جنت البقیع میں دفن کیا گیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6993]

عباس بن محمد دوری بیان کرتے ہیں کہ انہوں نے یحییٰ بن معین کو سیدنا انس رضی اللہ عنہ کی اس حدیث کا ذکر کرتے سنا کہ ابراہیم کی والدہ پر ایک شخص کے حوالے سے الزام لگایا گیا تھا تو نبی کریم صلی اللہ علیہ وسلم نے اسے قتل کرنے کا حکم دیا، مگر جب دیکھا گیا تو وہ مردانہ صلاحیت سے محروم (مجبوب) تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6994]

سیدنا انس رضی اللہ عنہ سے روایت ہے کہ ایک شخص پر رسول اللہ صلی اللہ علیہ وسلم کے صاحبزادے ابراہیم کی والدہ (سیدہ ماریہ رضی اللہ عنہا) کے حوالے سے تہمت لگائی گئی، تو رسول اللہ صلی اللہ علیہ وسلم نے سیدنا علی رضی اللہ عنہ سے فرمایا: ”جاؤ اور اس کی گردن اڑا دو“، سیدنا علی رضی اللہ عنہ اس کے پاس پہنچے تو وہ ایک کنویں میں ٹھنڈک حاصل کر رہا تھا، علی رضی اللہ عنہ نے اسے فرمایا: باہر نکلو، اس نے اپنا ہاتھ پکڑایا تو علی رضی اللہ عنہ نے اسے باہر نکالا، دیکھا تو وہ مجبوب تھا اور اس کا مردانہ عضو ہی نہ تھا، چنانچہ علی رضی اللہ عنہ اس کے قتل سے رک گئے اور نبی کریم صلی اللہ علیہ وسلم کی خدمت میں حاضر ہو کر عرض کی: یا رسول اللہ! وہ تو مجبوب ہے، اس کا عضو تناسل ہی نہیں۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6995]