سیدنا مصعب بن عبداللہ زبیری رضی اللہ عنہ سے مروی ہے کہ سیدہ ام خالد رضی اللہ عنہا کا نام امہ بنت خالد بن سعید بن عاص بن امیہ ہے، سیدنا خالد بن سعید اپنی اہلیہ ہمینہ بنت خلف کے ہمراہ حبشہ کی طرف ہجرت کر گئے تھے، وہیں ان کے ہاں امہ بنت خالد پیدا ہوئیں اور وہ حبشہ میں ہی رہیں یہاں تک کہ وہ دو کشتیوں کے ذریعے (مدینہ) پہنچے، اس وقت امہ جوان اور سمجھدار ہو چکی تھیں، ان کا نکاح سیدنا زبیر بن عوام رضی اللہ عنہ سے ہوا جن سے ان کے بیٹے عمر اور خالد پیدا ہوئے، انہوں نے طویل عمر پائی اور نبی کریم صلی اللہ علیہ وسلم سے روایات نقل کیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7105]

سیدہ ام خالد بنت خالد بن سعید رضی اللہ عنہا سے مروی ہے، انہوں نے کہا: میں نے رسول اللہ صلی اللہ علیہ وسلم کو عذابِ قبر سے پناہ مانگتے ہوئے سنا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7106]