سیدنا مصعب بن عبداللہ زبیری رضی اللہ عنہ سے مروی ہے کہ سیدہ ام قیس بنت محصن رضی اللہ عنہا سیدنا عکاشہ بن محصن کی بہن ہیں، وہ مکہ میں قدیم الاسلام تھیں اور اپنے گھر والوں کے ساتھ مدینہ ہجرت کی، وہ رسول اللہ صلی اللہ علیہ وسلم کے بعد عرصہ دراز تک حیات رہیں اور آپ صلی اللہ علیہ وسلم سے روایات نقل کیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7110]

سیدہ ام قیس رضی اللہ عنہا سے روایت ہے کہ رسول اللہ صلی اللہ علیہ وسلم ان کا ہاتھ تھامے ہوئے مدینہ کی ایک گلی سے گزر کر بقیع الغرقد تشریف لائے اور فرمایا: ”اے ام قیس!“ میں نے عرض کیا: میں حاضر ہوں اور آپ صلی اللہ علیہ وسلم کی فرماں برداری کے لیے تیار ہوں یا رسول اللہ، آپ صلی اللہ علیہ وسلم نے فرمایا: ”کیا تم یہ قبرستان دیکھ رہی ہو؟“ میں نے عرض کیا: جی ہاں یا رسول اللہ، آپ صلی اللہ علیہ وسلم نے فرمایا: ”اللہ تعالیٰ قیامت کے دن یہاں سے ستر ہزار ایسے لوگوں کو اٹھائے گا جن کے چہرے چودھویں کے چاند کی طرح روشن ہوں گے اور وہ بغیر حساب کے جنت میں داخل ہوں گے۔“ تب سیدنا عکاشہ رضی اللہ عنہ کھڑے ہوئے اور عرض کیا: اور میں بھی یا رسول اللہ؟ آپ صلی اللہ علیہ وسلم نے فرمایا: ”تم بھی“، پھر ایک اور صاحب کھڑے ہوئے اور وہی سوال کیا تو آپ صلی اللہ علیہ وسلم نے فرمایا: ”عکاشہ تم سے سبقت لے گئے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7111]