سیدنا ابوطلحہ رضی اللہ عنہ سے روایت ہے کہ وہ رسول اللہ صلی اللہ علیہ وسلم کی اس علالت کے دوران آپ صلی اللہ علیہ وسلم کی خدمت میں حاضر ہوئے جس میں آپ صلی اللہ علیہ وسلم کی وفات ہوئی، تو آپ صلی اللہ علیہ وسلم نے فرمایا: ”اپنی قوم (انصار) کو میرا سلام پہنچانا، کیونکہ جہاں تک میرا علم ہے وہ نہایت پاکدامن اور صابر لوگ ہیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7149]

سیدنا انس بن مالک رضی اللہ عنہ سے روایت ہے کہ سیدنا اسید بن حضیر اشہلی رضی اللہ عنہ رسول اللہ صلی اللہ علیہ وسلم کے پاس اس وقت آئے جب آپ صلی اللہ علیہ وسلم غلہ تقسیم فرما رہے تھے، انہوں نے آپ صلی اللہ علیہ وسلم سے انصار کے ایک خاندان بنو ظفر کا ذکر کیا جو بہت ضرورت مند تھے اور اس گھر کے اکثر افراد خواتین تھیں، رسول اللہ صلی اللہ علیہ وسلم نے ان سے فرمایا: ”اے اسید! تم نے ہمیں تب بتایا جب ہمارے پاس جو کچھ تھا وہ ختم ہو چکا ہے، اب جب تمہیں معلوم ہو کہ ہمارے پاس کوئی نئی چیز آئی ہے تو مجھے اس گھر والوں کے بارے میں ضرور یاد دلانا“، چنانچہ اس کے بعد خیبر سے غلہ، جو اور کھجوریں آئیں، رسول اللہ صلی اللہ علیہ وسلم نے وہ لوگوں میں تقسیم کیں اور انصار کو بھی بہت وافر مقدار میں دیا اور اس خاندان کو بھی بہت زیادہ عطا فرمایا، سیدنا اسید بن حضیر رضی اللہ عنہ نے شکریہ ادا کرتے ہوئے عرض کیا: اے اللہ کے نبی! اللہ تعالیٰ ہماری طرف سے آپ کو بہترین جزا عطا فرمائے، تو نبی کریم صلی اللہ علیہ وسلم نے فرمایا: ”اور تم اے گروہِ انصار! اللہ تمہیں بھی پاکیزہ ترین جزا عطا فرمائے، کیونکہ جہاں تک مجھے علم ہے تم لوگ نہایت پاکدامن اور صابر ہو، اور تم میرے بعد (حکمرانی اور تقسیمِ مال کے معاملے میں) حق تلفی (اثرہ) دیکھو گے، تو تم صبر کرنا یہاں تک کہ تم حوضِ کوثر پر مجھ سے آ ملو۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7150]