سیدنا عبداللہ بن عمرو رضی اللہ عنہ فرماتے ہیں: دو آدمی اپنا جھگڑا رسول اللہ صلی اللہ علیہ وسلم کی بارگاہ میں لے گئے، نبی اکرم صلی اللہ علیہ وسلم نے سیدنا عمرو سے کہا: ان کے درمیان فیصلہ کر دو، سیدنا عمرو رضی اللہ عنہ نے کہا: یا رسول اللہ صلی اللہ علیہ وسلم آپ کی موجودگی میں، میں کیسے فیصلہ کر سکتا ہوں۔ حضور صلی اللہ علیہ وسلم نے فرمایا: جی ہاں، اگر تم نے صحیح فیصلہ کیا تو تمہیں دس اجر ملیں گے، اور اگر تجھ سے خطا ہو گئی تب بھی (کم از کم) ایک نیکی تو تمہیں مل ہی جائے گی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو اس اسناد کے ہمراہ نقل نہیں کیا۔ [المستدرك على الصحيحين/كِتَابُ الْأَحْكَامِ/حدیث: 7180]

عیاض بن حماد رضی اللہ عنہ فرماتے ہیں کہ نبی اکرم صلی اللہ علیہ وسلم نے خطبہ کے دوران ارشاد فرمایا: تین آدمی جنتی ہیں۔ * وہ بادشاہ جس کو لوگ سچا کہیں، جو انصاف کرنے والا ہو، جس کے ساتھ عوام موافقت کرے۔ * ایسا رحم دل اور رقیق القلب انسان جو رشتہ داروں کے لئے نرم گوشہ رکھتا ہو۔ * غریب سفید پوش انسان (جو کسی سے سوال نہیں کرتا) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَحْكَامِ/حدیث: 7181]