سیدنا فضالہ بن عبید رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: وہ شخص کامیاب ہے جس کو اسلام کی ہدایت دی گئی، اور اس کی روزی پوری پوری ہو، اور وہ اس پر قناعت کرے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7321]

بشر بن مبارک راسی بیان کرتے ہیں کہ میں اپنے دادا کے ہمراہ ایک ولیمے میں تھا، اس ولیمے میں غالب القطان بھی موجود تھے، بشر کہتے ہیں: دسترخوان لا کر بچھایا گیا، لوگوں نے اپنے ہاتھ روک لئے، غالب القطان نے کہا: کیا بات ہے؟ تم لوگ کھانا کیوں نہیں کھا رہے؟ لوگوں نے کہا: ہم سالن کا انتظار کر رہے ہیں۔ سیدنا غالب القطان نے فرمایا: کریمہ بنت ہمام طائیہ نے ہمیں بتایا ہے کہ ام المومنین سیدہ عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم نے ارشاد فرمایا: روٹی کا احترام کیا کرو، اور روٹی کا احترام یہ ہے کہ جب یہ آ جائے تو پھر کسی اور چیز کا انتظار نہ کیا جائے۔ یہ کہہ کر غالب القطان (روکھی روٹی) کھانے لگ گئے، ہم نے بھی (اکیلی روٹیاں ہی) کھا لیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7322]