ابوابی بن ام حزام نے رسول اللہ صلی اللہ علیہ وسلم کے ہمراہ دو نمازیں پڑھی ہیں، آپ فرماتے ہیں کہ میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ تم سنا اور سنوت کو لازم پکڑو، کیونکہ اس میں سام کے سوا ہر چیز کا علاج ہے۔ آپ صلی اللہ علیہ وسلم سے عرض کی گئی: یا رسول اللہ صلی اللہ علیہ وسلم ” سام “ کس کو کہتے ہیں؟ آپ صلی اللہ علیہ وسلم نے فرمایا: موت۔ ابراہیم بن ابی عبلہ فرماتے ہیں: سنوت سے مراد ” زیرہ “۔ اور دیگر کئی محدثین کا موقف یہ ہے کہ سنوت اس شہد کو کہتے ہیں جو گھی والے مشکیزے میں ہوتا ہے۔ جیسا کہ ایک شاعر نے کہا ہے۔ وہ گھی کے ساتھ سنوت کی طرح ہیں ان دونوں میں خیر نہیں ہے وہ تو پڑوسی کو خالی نہیں ہونے دیتے۔ (بعض نے کہا ہے کہ سنوت ” کلونجی “ کو کہتے ہیں) [المستدرك على الصحيحين/كِتَابُ الطِّبِّ/حدیث: 7630]

سیدنا زید بن ارقم رضی اللہ عنہ فرماتے ہیں: رسول اللہ صلی اللہ علیہ وسلم نے ہمیں حکم دیا کہ ہم ” ذات الجنب “ (یعنی نمونیا) کا علاج ” قسط البحری “ (یعنی عود ہندی) اور زیتون کے تیل کے ساتھ کریں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اور اسی حدیث کو قتادہ نے میمون ابوعبداللہ سے روایت کیا ہے۔ (جیسا کہ درج ذیل ہے) [المستدرك على الصحيحين/كِتَابُ الطِّبِّ/حدیث: 7631]

ابوعبداللہ، زید بن ارقم کا یہ بیان نقل کرتے ہیں کہ میں نے رسول اللہ صلی اللہ علیہ وسلم کو ذات الجنب (نمونیا) کے لئے زیتون کے تیل اور ورس (زرد رنگ کی گھاس نما ایک بوٹی) کی بہت تعریف کرتے ہوئے سنا ہے۔ سیدنا قتادہ کہتے ہیں: جو جانب متاثر ہو، منہ کی اس جانب سے دوا پلائی جائے۔ اس حدیث کو عبدالرحمن بن میمون نے اپنے والد سے روایت کیا ہے۔ [المستدرك على الصحيحين/كِتَابُ الطِّبِّ/حدیث: 7632]

عبدالرحمن بن میمون اپنے والد کے حوالے سے سیدنا زید بن ارقم رضی اللہ عنہ کا یہ بیان نقل کرتے ہیں کہ رسول اللہ صلی اللہ علیہ وسلم نے ذات الجنب کے لئے ہمیں ورس (زرد رنگ کی گھاس نما ایک بوٹی)، زیتون کے تیل اور قسط (عود ہندی) کی بہت تاکید فرمائی۔ [المستدرك على الصحيحين/كِتَابُ الطِّبِّ/حدیث: 7633]

سیدہ اسماء بنت عمیس رضی اللہ عنہا فرماتی ہیں: رسول اللہ صلی اللہ علیہ وسلم سب سے پہلے سیدہ میمونہ رضی اللہ عنہا کے گھر بیمار ہوئے، آپ کی تکلیف میں اس قدر تیزی آئی کہ آپ بے ہوش ہو گئے، گھر کی خواتین نے آپ صلی اللہ علیہ وسلم کو ” لد “ (منہ کے کنارے سے دوا پلانے) کے بارے میں مشورہ کیا۔ (دوا پلانے کا یہ ایک خاص طریقہ ہوتا تھا) مشورے کے بعد انہوں نے رسول اللہ صلی اللہ علیہ وسلم کو منہ کے ایک کنارے سے دوا پلا دی۔ جب حضور صلی اللہ علیہ وسلم کو افاقہ ہوا، تو آپ صلی اللہ علیہ وسلم نے سرزمین حبشہ کی جانب اشارہ کرتے ہوئے فرمایا: اس علاقے سے آنے والی عورتوں نے یہ کیا ہے، ان خواتین میں سیدہ اسماء بنت عمیس رضی اللہ عنہا بھی تھیں۔ لوگوں نے کہا: یا رسول اللہ صلی اللہ علیہ وسلم ہم سمجھ رہے تھے کہ آپ کو ” ذات الجنب “ ہے۔ آپ صلی اللہ علیہ وسلم نے فرمایا: یہ تو بیماری ہے، اللہ تعالیٰ مجھے اس میں مبتلا نہیں کرے گا۔ اس وقت گھر میں جتنے لوگ ہیں سب کو منہ کے کنارے سے دوا پلائی جائے، سوائے رسول اللہ صلی اللہ علیہ وسلم کے چچا سیدنا عباس رضی اللہ عنہ کے۔ اس دن رسول اللہ صلی اللہ علیہ وسلم کے حکم کی بناء پر ام المومنین سیدہ میمونہ رضی اللہ عنہا نے بھی منہ کے کنارے سے دوا پی حالانکہ وہ اس دن روزے سے تھیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كِتَابُ الطِّبِّ/حدیث: 7634]