نافع بیان کرتے ہیں کہ سیدنا عبداللہ بن عمر رضی اللہ عنہما نے مجھ سے کہا: میرا بلڈ پریشر بہت ہائی ہو رہا ہے۔ اس لئے کسی حجام کو بلا کر لاؤ، وہ بہت بوڑھا بھی نہ ہو اور بالکل بچہ بھی نہ ہو، کیونکہ میں سے رسول اللہ صلی اللہ علیہ وسلم کو یہ فرماتے ہوئے سنا ہے کہ نہار منہ پچھنے لگوانا کم تکلیف دہ ہے، اور اس میں شفاء بھی ہے، برکت بھی ہے۔ یہ عقل کو بڑھاتی ہے اور حافظہ مضبوط کرتی ہے، اس لئے جو اللہ کے نام پر پچھنے لگوانا چاہے، اس کو چاہیے کہ جمعرات کے دن پچھنے لگوائے، اور جمعہ کے دن، ہفتہ کے دن اور اتوار کے دن پچھنے لگوانے سے گریز کرنا چاہیے۔ سوموار کو اور منگل کو پچھنے لگواؤ، کیونکہ یہ وہ دن ہے جس میں اللہ تعالیٰ نے سیدنا ایوب علیہ السلام کی تکلیف دور فرمائی تھی، بدھ کے دن بھی پچھنے لگوانے سے بچو، کیونکہ اس دن سیدنا ایوب علیہ السلام بیماری میں مبتلا ہوئے تھے۔ اور جذام اور برص بدھ کے دن یا بدھ کی رات کو پیدا ہوتا ہے۔ [المستدرك على الصحيحين/كِتَابُ الطِّبِّ/حدیث: 7671]

سیدنا انس رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جب گرمی بہت سخت ہو جائے تو حجامت (پچھنے لگوانے) سے مدد لو تاکہ ہائی بلڈ پریشر کہیں تمہیں مار نہ ڈالے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الطِّبِّ/حدیث: 7672]