سیدنا انس بن مالک رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: جس نے اللہ کو یاد کیا اور اس کی آنکھ سے اللہ کے خوف سے آنسو نکل کر زمین تک آ گئے، اللہ تعالیٰ اس کو قیامت کے دن عذاب نہیں دے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7861]

سیدنا عقبہ بن عامر جہنی رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: ہر دن کے اور ہر رات کے عمل پر مہر لگا دی جاتی ہے جتیٰ کہ جب بندے اور اس کے اعمال کے درمیان (کسی مجبوری کی بناء پر) رکاوٹ آ جاتی ہے تو اس کے محافظ فرشتے کہتے ہیں: اے ہمارے رب تیرے بندے کے یہ اعمال اس وقت کے ہیں جب کہ ابھی اس کے اور اس کے اعمال کے درمیان رکاوٹ نہیں تھی۔ اور تو اس کو بہتر جانتا ہے۔ سیدنا عقبہ بن عامر جہنی فرماتے ہیں: بندے کی موت کا سب سے پہلے علم اس کے محافظ فرشتے کو ہوتا ہے، کیونکہ وہی عمل لے کر آسمانوں پر جاتا ہے اور رزق لے کر نازل ہوتا ہے، جب اس کا رزق نہیں لاتا تو اس کو علم ہو جاتا ہے کہ اب یہ مر جائے گا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7862]