سعید بن حارث سے روایت ہے کہ انہوں نے سیدنا عبداللہ بن عمر رضی اللہ عنہما کو سنا جب بنو کعب کے مسعود بن عمرو نامی ایک شخص نے ان سے دریافت کیا کہ اے ابوعبدالرحمن! میرا بیٹا ملکِ فارس میں ان لوگوں کے ہمراہ تھا جو عمر بن عبید اللہ کے پاس مقیم تھے، اور اسی دوران بصرہ میں شدید طاعون کی وبا پھیل گئی، جب مجھے اس کی اطلاع ملی تو میں نے یہ منت مانی کہ اگر اللہ تعالیٰ میرے بیٹے کو بخیر و عافیت واپس لے آئے تو میں پیدل چل کر بیت اللہ جاؤں گا، چنانچہ وہ بیمار حالت میں واپس آیا اور پھر فوت ہو گیا، اب اس بارے میں آپ کی کیا رائے ہے؟ سیدنا ابن عمر رضی اللہ عنہما نے فرمایا: ”کیا تمہیں نذر ماننے سے منع نہیں کیا گیا تھا؟ یقیناً رسول اللہ صلی اللہ علیہ وسلم نے ارشاد فرمایا: «النَّذْرُ لَا يُقَدِّمُ شَيْئًا وَلَا يُؤَخِّرُهُ، فَإِنَّمَا يُسْتَخْرَجُ بِهِ مِنَ الْبَخِيلِ» ”نذر (تقدیر کی) کسی چیز کو نہ تو وقت سے پہلے لا سکتی ہے اور نہ ہی اسے ٹال سکتی ہے، اس کے ذریعے تو صرف بخیل سے مال نکلوایا جاتا ہے“، تم اپنی نذر پوری کرو۔“
یہ حدیث شیخین کی شرط پر صحیح ہے لیکن شیخین نے اسے ان الفاظ کے سیاق و سباق کے ساتھ روایت نہیں کیا۔ [المستدرك على الصحيحين/كِتَابُ النُّذُورِ/حدیث: 8033]