سیدنا عبداللہ بن عمر رضی اللہ عنہما کے بارے میں مروی ہے کہ بنی کعب کے مسعود بن عمرو نامی ایک آدمی ان سے کہنے لگا: اے ابوعبدالرحمن! میرا ایک بیٹا سرزمین فارس میں تھا، وہ عمر بن عبیداللہ کے ساتھیوں میں شامل تھا، اور بصرہ میں طاعون کی وباء میں پھیل گئی ہے، جب مجھے یہ اطلاع ملی تو میں نے نذر مانی تھی کہ یا اللہ اگر میرا بیٹا گھر آ جائے تو میں کعبہ تک پیدل چل کر جاؤں گا، میرا بیٹا گھر تو آ گیا، لیکن بیمار ہو کر آیا اور اسی بیماری میں وہ فوت بھی ہو گیا، آپ اس سلسلہ میں کیا فرماتے ہیں؟ سیدنا عبداللہ بن عمر رضی اللہ عنہما نے فرمایا: کیا تمہیں نذر ماننے سے منع نہیں کیا گیا تھا؟ بے شک رسول اللہ صلی اللہ علیہ وسلم نے ارشاد فرمایا: نذر نہ تو کسی چیز کو پہلے لے آتی ہے اور نہ کسی چیز میں تاخیر کر سکتی ہے، اس کے ذریعے اللہ تعالیٰ بخیل کا مال نکلواتا ہے۔ تم اپنی نذر پوری کرو۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین رحمۃ اللہ علیہما نے اس کو اس اسناد ہے ہمراہ نقل نہیں کیا۔ [المستدرك على الصحيحين/كِتَابُ النُّذُورِ/حدیث: 8033]

سیدنا ابوہریرہ رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: نذر انسان کے لیے ایسی کوئی چیز پہلے نہیں لے آتی جس کو اللہ تعالیٰ نے دیر سے لکھا ہوتا ہے، بلکہ خود نذر تقدیر کے مطابق ہوتی ہے (یعنی انسان نذر بھی تبھی مانتا ہے جب وہ تقدیر میں لکھی ہو) اس کے ذریعے بخیل سے وہ مال نکلوایا جاتا ہے جو وہ عام حالات میں نکالنا نہیں چاہتا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو اس اسناد کے ہمراہ نقل نہیں کیا۔ [المستدرك على الصحيحين/كِتَابُ النُّذُورِ/حدیث: 8034]