سیدنا ابوہریرہ رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: جس کو اللہ تعالیٰ نے دو جبڑوں کے درمیان والی چیز اور دو ٹانگوں کے درمیان والی چیز کے شر سے بچا لیا، وہ جنت میں جائے گا۔ [المستدرك على الصحيحين/كِتَابُ الْحُدُودِ/حدیث: 8258]

سیدنا مغیرہ فرماتے ہیں: سیدنا سعد بن عبادہ رضی اللہ عنہ کے ہاں ایک ایسے آدمی کا ذکر ہوا جس نے اپنے باپ کی بیوی سے نکاح کیا تھا، آپ نے فرمایا: اگر میں اس کو پاؤں تو تلوار کے ساتھ اس کو قتل کر دوں، سیدنا مغیرہ کہتے ہیں: میں نے یہ بات نبی اکرم صلی اللہ علیہ وسلم کی خدمت میں عرض کی: حضور صلی اللہ علیہ وسلم نے فرمایا: میں سعد سے زیادہ غیرت والا ہوں، اور اللہ تعالیٰ مجھ سے بھی زیادہ غیرت والا ہے، اور اللہ تعالیٰ کی بارگاہ میں معذرت سے زیادہ پسندیدہ کوئی چیز نہیں ہے اور اللہ تعالیٰ نے اسی کام کے لیے رسولوں کو مبعوث فرمایا، اور اللہ تعالیٰ کو مدح سے زیادہ کوئی چیز عزیز نہیں ہے اسی وجہ سے اللہ تعالیٰ نے جنت کا وعدہ فرمایا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ ابوعوانہ نے اس اسناد میں سیدنا مغیرہ بن شعبہ رضی اللہ عنہ کے آزاد کردہ غلام کا نام ذکر کیا ہے۔ [المستدرك على الصحيحين/كِتَابُ الْحُدُودِ/حدیث: 8259]

سیدنا مغیرہ بن شعبہ فرماتے ہیں: سیدنا سعد بن عبادہ رضی اللہ عنہ فرمایا: اگر میں کسی آدمی کو اس کے باپ کی بیوی کے ساتھ دیکھ لوں تو تلوار کے ساتھ اس کی گردن اڑا دوں، سیدنا سعد کی یہ بات رسول اللہ صلی اللہ علیہ وسلم تک پہنچ گئی، حضور صلی اللہ علیہ وسلم نے فرمایا: تم سعد کی غیرت سے تعجب کرتے ہو؟ میں اس سے بھی زیادہ غیرت والا ہوں اور اللہ تعالیٰ مجھ سے بھی زیادہ غیرت والا ہے۔ اور اللہ تعالیٰ کی غیرت کی وجہ سے ظاہری باطنی فحاشی حرام کی گئی، اور کوئی آدمی اللہ تعالیٰ سے زیادہ غیرت والا نہیں ہے اور معافی مانگنے والے سے زیادہ اللہ تعالیٰ کو کوئی شخص پسند نہیں ہے۔ اسی وجہ سے اس نے جنت کا وعدہ کیا ہے۔ [المستدرك على الصحيحين/كِتَابُ الْحُدُودِ/حدیث: 8260]

سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: اے قریشی جوانو! زنا مت کرو۔ خبردار! جس نے اپنی شرمگاہ کی حفاظت کی، وہ جنتی ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل کیا۔ [المستدرك على الصحيحين/كِتَابُ الْحُدُودِ/حدیث: 8261]

سیدنا ابوموسیٰ رضی اللہ عنہ فرماتے ہیں: میں اور ابوالدرداء رضی اللہ عنہما نبی اکرم صلی اللہ علیہ وسلم کی بارگاہ میں موجود تھے، میں نے حضور صلی اللہ علیہ وسلم کو یہ فرماتے ہوئے سنا ہے کہ ” جس نے اپنے جبڑوں کے درمیان والی اور اپنی ٹانگوں کے درمیان والی چیز کی حفاظت کر لی، وہ جنت میں جائے گا۔ [المستدرك على الصحيحين/كِتَابُ الْحُدُودِ/حدیث: 8262]