ہلال بن یساف فرماتے ہیں: ہم سوید بن مقرن کے گھر میں موجود تھے، ہمارے ساتھ ایک گرم مزاج جاہل بوڑھا بھی تھا، سوید کی لونڈی نے اس بوڑھے کو کچھ کہا تو اس نے لونڈی کو تھپڑ مار دیا، سوید اس پر بہت سخت ناراض ہوئے، وہ اس سے پہلے کبھی کسی پر اتنے ناراض نہیں ہوئے تھے، انہوں نے فرمایا: تمہیں مارنے کے لئے اس کے چہرے کے علاوہ کوئی جگہ نہیں ملی؟ بنی مقرن میں، میں ساتواں شخص تھا (یعنی ہم سات بھائی تھے)، ہمارے پاس صرف ایک خادم تھا۔ اس کو ہمارے سب سے چھوٹے نے تھپڑ مار دیا، رسول اللہ صلی اللہ علیہ وسلم نے ہمیں حکم دیا کہ ہم اس کو آزاد کر دیں۔ [المستدرك على الصحيحين/كِتَابُ الْحُدُودِ/حدیث: 8302]

سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: اولاد کو اس کے باپ سے قصاص نہیں دلوایا جائے گا اور حدود مسجد میں قائم نہیں کی جائیں گی۔ [المستدرك على الصحيحين/كِتَابُ الْحُدُودِ/حدیث: 8303]