سیدنا جابر رضی اللہ عنہ سے روایت ہے کہ ایک عورت رسول اللہ صلی اللہ علیہ وسلم کی بارگاہ میں حاضر ہوئی اور عرض کی: اے اللہ کے رسول! میرے اس بیٹے کو عذرہ (حلق کی بیماری) ہے، آپ صلی اللہ علیہ وسلم نے فرمایا: ”تم اپنے بچوں کے حلق کو (دبا کر) نہ جلایا کرو، تم عودِ ہندی (قسطِ ہندی) اور ورس (ایک زرد گھاس) کا استعمال کیا کرو اور اسے ناک کے ذریعے یہ دوا دو۔“ [المستدرك على الصحيحين/كِتَابُ الطِّبِّ/حدیث: 8443]

سیدنا زید بن ارقم رضی اللہ عنہ سے روایت ہے، انہوں نے کہا: میں نے اللہ کے نبی صلی اللہ علیہ وسلم کو سنا کہ آپ صلی اللہ علیہ وسلم ذات الجنب (پھیپھڑوں کی تکلیف) کے لیے زیتون کے تیل اور ورس کا نسخہ بیان فرما رہے تھے۔ قتادہ نے کہا: (اسے استعمال کرنے کا طریقہ یہ ہے کہ) اسے اس جانب سے منہ میں ڈالا جائے جس طرف تکلیف ہو۔
یہ حدیث عالی الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الطِّبِّ/حدیث: 8444]

سیدنا جابر رضی اللہ عنہ سے روایت ہے، انہوں نے کہا: نبی کریم صلی اللہ علیہ وسلم سیدہ عائشہ رضی اللہ عنہا کے پاس تشریف لائے تو ان کے پاس ایک عورت تھی جس کے ساتھ اس کا بچہ تھا جس کے نتھنوں سے خون بہہ رہا تھا، نبی کریم صلی اللہ علیہ وسلم نے پوچھا: ”اسے کیا ہوا ہے؟“ لوگوں نے بتایا کہ اسے عذرہ (حلق کا ورم) ہے، آپ صلی اللہ علیہ وسلم نے فرمایا: ”تم پر افسوس ہے، اپنی اولاد کو قتل نہ کرو؛ جس عورت کے بچے کو عذرہ کی تکلیف ہو اسے چاہیے کہ وہ قسطِ ہندی لے کر اسے پانی میں رگڑے اور پھر اسے ناک کے راستے اس کی نسوار دے“، پھر آپ صلی اللہ علیہ وسلم نے سیدہ عائشہ رضی اللہ عنہا کو حکم دیا تو انہوں نے اس بچے کے ساتھ ایسا ہی کیا اور وہ تندرست ہو گیا۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الطِّبِّ/حدیث: 8445]