سیدنا ابوسعید خدری رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: یاجوج و ماجوج کے خروج کے بعد بھی بیت اللہ کا حج اور عمرہ ہوتا رہے گا، کیونکہ ہو سکتا ہے کہ ان کے بعد حج و عمرہ ہو، اور پھر کسی موقع پر حج ختم ہو جائے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8605]

سیدنا جابر بن عبداللہ رضی اللہ عنہما فرماتے ہیں: قریب ہے کہ اہل عراق کے پاس کوئی ایک درہم بھی نہ آئے اور ایک قفیز گندم تک نہ آئے، لوگوں نے پوچھا: اے ابوعبداللہ! اس کی وجہ کیا ہے؟ آپ رضی اللہ عنہ نے فرمایا: اہل عجم کی جانب سے، کہ وہ اس کو روک سکتے ہیں، پھر کچھ دیر آپ خاموش رہے، پھر بولے: قریب ہے کہ اہل شام کی جانب کوئی ایک دینار نہ آئے اور ایک مد گندم نہ آئے، لوگوں نے پوچھا: اس کی کیا وجہ ہے؟ آپ رضی اللہ عنہ نے فرمایا: روم کی جانب سے، ہو سکتا ہے کہ وہ اس میں رکاوٹ ڈال دیں۔ پھر کہنے لگے: رسول اللہ صلی اللہ علیہ وسلم نے ارشاد فرمایا ہے ” میری امت میں ایک ایسا خلیفہ آئے گا جو اتنا مال اکٹھا کرے گا جس کو کوئی گن نہیں سکے گا “ پھر فرمایا: اس ذات کی قسم! جس کے قبضہ قدرت میں میری جان ہے، حالات دوبارہ اسی طور پر لوٹ آئیں گے جیسے شروع شروع میں تھے، ایمان مکمل طور پر مدینہ میں سمٹ آئے گا، جیسا کہ مدینہ سے شروع ہوا تھا، حتی کہ ایمان صرف مدینے ہی میں ہو گا۔ پھر فرمایا: رسول اللہ صلی اللہ علیہ وسلم نے ارشاد فرمایا ہے ” کوئی بندہ مدینے سے نکلے، اور اس کے دل میں مدینے کی محبت موجود ہو تو اللہ تعالیٰ اس کے لئے اچھا نعم البدل عطا فرمائے گا، اور لوگ سبزیوں وغیرہ کے نرخوں میں بہت کمی کی خبریں سنیں گے۔ اور اس کی پیروی کریں گے۔ اور مدینہ سب کے لئے بہتر ہے، کاش کہ لوگ اس بات کو سمجھ لیں “۔ ٭٭ امام مسلم نے داؤد بن ابی ہند کے واسطے سے ابی نضرہ سے، انہوں نے سیدنا ابوسعید رضی اللہ عنہ سے روایت کیا ہے کہ نبی اکرم صلی اللہ علیہ وسلم نے ارشاد فرمایا: آخری زمانے میں ایک بادشاہ آئے گا، جو ان گنت مال دے گا۔ اور یہ اس کی علت ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو اس اسناد کے ہمراہ نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8606]

سیدنا جابر یا ابوسعید رضی اللہ عنہما فرماتے ہیں کہ نبی اکرم صلی اللہ علیہ وسلم نے ارشاد فرمایا: اس امت کے آخری زمانے میں ایک بادشاہ ہو گا، جو اتنا مال تقسیم کرے گا کہ شمار سے باہر ہو گا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8607]

سیدنا عبداللہ بن مسعود رضی اللہ عنہ فرماتے ہیں کہ لوگوں پر ایک زمانہ آئے گا، ایک آدمی قبرستان میں جا کر قبر پر لیٹ جائے گا اور کہے گا: کاش اپنے اس ساتھی کی بجائے اس قبر میں، میں ہوتا۔ اس کو اللہ تعالیٰ سے ملاقات کی محبت نہیں ہو گی، بلکہ وہ مصیبتوں سے گھبرا کر ایسا کر رہا ہو گا۔ اب تو گھبرا کے یہ کہتے ہیں کہ مر جائیں گے، مر کے بھی نہ چین آیا تو کدھر جائیں گے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8608]

سیدنا علقمہ خزاعی بیان کرتے ہیں کہ ایک دیہاتی نے کہا: یا رسول اللہ صلی اللہ علیہ وسلم ! کیا اسلام کی کوئی انتہاء بھی ہے؟ آپ صلی اللہ علیہ وسلم نے فرمایا: ہاں۔ عرب و عجم میں جس گھرانے کے ساتھ اللہ تعالیٰ خیر کا ارادہ فرمائے گا، اس میں اسلام داخل فرما دے گا، لوگوں نے پوچھا: یا رسول اللہ صلی اللہ علیہ وسلم پھر کیا ہو گا؟ آپ صلی اللہ علیہ وسلم نے فرمایا: پھر کالی گھٹاؤں کی مانند فتنے آئیں گے، اس دیہاتی نے کہا: یا رسول اللہ صلی اللہ علیہ وسلم کیا واقعی ایسا ہو گا؟ بی اکرم صلی اللہ علیہ وسلم نے فرمایا: اس ذات کی قسم! جس کے قبضہ قدرت میں میری جان ہے تم دوبارہ الگ الگ جماعتوں میں بٹ جاؤ گے اور ایک دوسرے کی گردن مارو گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو اس اسناد کے ہمراہ نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8609]