سیدنا عثمان بن عفان رضی اللہ عنہ نے فتنوں کی مثال دیتے ہوئے فرمایا: فتنہ کی مثال تین آدمیوں کی طرح ہے، جنہوں نے سفر شروع کیا، سفر کے دوران رات ہو گئی اور رات کے اندھیرے میں یہ تینوں ایک ایسی جگہ پہنچے جہاں سے تین جانب راستہ نکلتا تھا، ان میں سے ایک نے کہا: ہمیں دائیں جانب جانا چاہئے، وہ دائیں جانب چل پڑا اور بھٹک گیا، دوسرے نے کہا: ہمیں بائیں جانب جانا چاہئے، وہ بائیں جانب چلا تو وہ بھی بھٹک گیا، تیسرے نے کہا: میں یہیں کھڑا رہتا ہوں اور صبح ہونے کا انتظار کرتا ہوں، یہ کھڑا رہا اور جب صبح ہوئی تو اس کو درست راستہ مل گیا۔ ٭٭ ابوالعالیہ کہتے ہیں: ہم یہ حدیث بیان کیا کرتے تھے کہ لوگوں پر ایک زمانہ ایسا بھی آئے گا کہ پورے گھر والوں میں سے بہتر وہ ہو گا جو حق کو اپنے بہت قریب دیکھے گا اور فتنوں سے کنارہ کشی اختیار کرے گا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8864]

8864 م - ابو العالیہ بیان کرتے ہیں کہ: ہمیں یہ حدیث سنائی جاتی تھی کہ لوگوں پر عنقریب ایک ایسا زمانہ آئے گا جس میں سب سے بہتر وہ شخص ہوگا جو حق کو (اپنے سے) قریب دیکھے گا اور فتنوں سے کنارہ کشی اختیار کرے گا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8864M]