مالک بن ابی مریم کہتے ہیں کہ عبدالرحمن بن غنم رضی اللہ عنہ آئے اور «طِلَاء» (انگور کے شیرے کو پکا لیا جائے یہاں تک کہ دو حصے خشک ہو جائیں اور ایک حصہ باقی رہ جائے تو اسے «طِلَاء» کہتے ہیں) کا ذکر ہوا تو انہوں نے کہا: سیدنا ابو مالک اشعری رضی اللہ عنہ نے بیان کیا کہ انہوں نے رسول اللہ صلی اللہ علیہ وسلم سے سنا ہے، آپ صلی اللہ علیہ وسلم فرماتے تھے: ”(ایک وقت آئے گا کہ) میری امت کے کچھ لوگ شراب پیئیں گے اور اس کا نام کچھ اور رکھ لیں گے۔“ [سنن ابي داود/كِتَاب الْأَشْرِبَةِ/حدیث: 3688]

جناب ابومنصور حارث بن منصور رحمہ اللہ کہتے ہیں کہ میں نے جناب سفیان ثوری رحمہ اللہ سے سنا جبکہ ان سے بادہ کے متعلق سوال کیا گیا تو انہوں نے کہا کہ رسول اللہ صلی اللہ علیہ وسلم نے فرمایا: ”میری امت کے کچھ لوگ شراب پیئیں گے اور اس کا نام کچھ اور رکھ لیں گے۔“ امام ابوداؤد رحمہ اللہ نے فرمایا کہ سفیان ثوری رحمہ اللہ نے کہا: ”بادہ فاسق لوگوں کا مشروب ہے۔“ [سنن ابي داود/كِتَاب الْأَشْرِبَةِ/حدیث: 3689]