سیدنا عبداللہ بن حبشی رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”جس نے بیری کا درخت کاٹا، اللہ اس کے سر کو جہنم میں الٹا لٹکائے گا۔“ امام ابوداؤد رضی اللہ عنہ سے اس حدیث کی توضیح پوچھی گئی، تو انہوں نے فرمایا: ”یہ حدیث مختصر ہے۔ اس سے مراد یہ ہے کہ جنگل میں لگی بیری کا درخت جو آنے جانے والے مسافروں اور جانوروں کے لیے سائے کا کام دیتا ہو اور کوئی شخص بے مقصد ظلم سے اسے کاٹ ڈالے، تو اللہ اسے جہنم میں الٹا لٹکائے گا۔“ [سنن ابي داود/أبواب السلام /حدیث: 5239]

جناب عثمان بن ابو سلیمان نے ثقیف کے ایک آدمی سے، اس نے سیدنا عروہ بن زبیر رحمہ اللہ سے، انہوں نے نبی کریم صلی اللہ علیہ وسلم سے مرفوع روایت کیا اور مذکورہ بالا حدیث کی مانند بیان کی۔ [سنن ابي داود/أبواب السلام /حدیث: 5240]

حسان بن ابراہیم کہتے ہیں کہ میں نے ہشام بن عروہ رحمہ اللہ سے یہ مسئلہ پوچھا کہ بیری کا کاٹنا کیسا ہے؟ جبکہ وہ اپنے والد عروہ رحمہ اللہ کے محل کے ساتھ ٹیک لگائے بیٹھے تھے، تو انہوں نے کہا: ”کیا تم یہ دروازے اور چوکھٹیں دیکھ رہے ہو؟ یہ عروہ رحمہ اللہ کی بیریوں سے بنائے گئے ہیں اور عروہ رحمہ اللہ انہیں اپنی زمین سے کاٹ لیا کرتے تھے“ اور کہا کہ ”اس میں کوئی حرج نہیں ہے۔“ حمید بن مسعدہ رحمہ اللہ نے مزید کہا کہ ہشام رحمہ اللہ نے کہا: ”ارے عراقی! (حسان بن ابراہیم) تو تو میرے پاس ایک بدعت والی بات لایا ہے۔“ اس نے کہا: میں نے جواب دیا کہ ”بدعت تو تمہاری طرف سے ہے۔ میں نے مکہ میں علماء سے سنا ہے جو یہ بیان کرتے ہیں کہ رسول اللہ صلی اللہ علیہ وسلم نے ایسے آدمی پر لعنت کی ہے جو بیری کو کاٹے۔“ پھر مذکورہ بالا کے ہم معنی بیان کیا۔ [سنن ابي داود/أبواب السلام /حدیث: 5241]