جناب ابن عجلان رحمہ اللہ نے یہ حدیث اختصار سے روایت کی، کہا: ”اسے تین بار خبردار کرے۔ اس کے بعد اگر ظاہر ہو تو قتل کر دے، بلاشبہ وہ شیطان ہے۔“ [سنن ابي داود/أبواب السلام /حدیث: 5258]

جناب ابوسائب مولیٰ ہشام بن زہرہ سے روایت ہے کہ وہ سیدنا ابوسعید خدری رضی اللہ عنہ کے ہاں گئے اور مذکورہ بالا حدیث کی مانند بلکہ اس سے کامل روایت کی، کہا: ”اسے تین دن تک متنبہ کرو، اگر اس کے بعد تمہارے سامنے آئے تو قتل کر دو، بلاشبہ وہ شیطان ہے۔“ [سنن ابي داود/أبواب السلام /حدیث: 5259]

جناب عبدالرحمٰن بن ابولیلیٰ اپنے والد رضی اللہ عنہ سے روایت کرتے ہیں کہ رسول اللہ صلی اللہ علیہ وسلم سے گھروں میں پائے جانے والے سانپوں کے متعلق پوچھا گیا تو آپ صلی اللہ علیہ وسلم نے فرمایا: ”جب تم ان میں سے کسی چیز کو اپنے گھروں میں دیکھو تو ان سے کہو: میں تمہیں وہ قسم دیتا ہوں جو سیدنا نوح علیہ السلام نے تمہیں دی تھی۔ میں تمہیں وہ قسم دیتا ہوں جو سیدنا سلیمان علیہ السلام نے تمہیں دی تھی کہ ہمیں کسی قسم کی ایذا نہ دینا۔ اگر پھر بھی وہ نکلیں تو قتل کر دو۔“ [سنن ابي داود/أبواب السلام /حدیث: 5260]

سیدنا ابن مسعود رضی اللہ عنہ نے فرمایا کہ ”سب قسم کے سانپوں کو قتل کر دیا کرو، سوائے ان کے جو سفید چاندی کی چھڑی کی مانند ہوں۔“ امام ابوداؤد رحمہ اللہ فرماتے ہیں کہ ”مجھے ایک شخص نے بتایا کہ سانپ کی شکل میں جن اپنے چلنے میں ٹیڑھا ہو کر نہیں چلتا ہے، اگر وہ بالکل سیدھا چلے تو ان شاء اللہ یہ اس کے جن ہونے کی علامت ہو گی۔“ [سنن ابي داود/أبواب السلام /حدیث: 5261]