حضرت عائشہ رضی اللہ عنہا سے روایت ہے کہ حضرت رفاعہ قرظی رضی اللہ عنہ کی بیوی رسول اللہ صلی اللہ علیہ وسلم کی خدمت میں حاضر ہوئی اور عرض کیا: ”میں رفاعہ قرظی رضی اللہ عنہ کے نکاح میں تھی۔ اس نے مجھے طلاق دے دی اور «بَتَّةً» (آخری طلاق) بھی دے ڈالی۔ (اس کے بعد) میں نے حضرت عبدالرحمٰن بن زبیر رضی اللہ عنہ سے نکاح کر لیا۔ (لیکن) ان کے پاس تو جو کچھ ہے وہ کپڑے کے سرے کی طرح ہے۔“ نبی صلی اللہ علیہ وسلم مسکرائے اور فرمایا: ”تم دوبارہ رفاعہ (رضی اللہ عنہ) سے نکاح کرنا چاہتی ہو؟ نہیں، نہیں، (یہ نہیں ہو سکتا) حتی کہ تو اس (عبدالرحمٰن رضی اللہ عنہ) سے لذت حاصل کرے اور وہ تجھ سے لذت حاصل کرے۔“ [سنن ابن ماجه/كتاب النكاح/حدیث: 1932]

حضرت عبداللہ بن عمر رضی اللہ عنہ سے روایت ہے کہ نبی صلی اللہ علیہ وسلم نے اس شخص کے بارے میں فرمایا جس کے نکاح میں کوئی عورت ہو، وہ اسے طلاق دے دے، پھر اس عورت سے کوئی اور مرد نکاح کر کے خلوت سے پہلے طلاق دے دے، کیا وہ دوبارہ پہلے مرد سے نکاح کر سکتی ہے؟ (نبی صلی اللہ علیہ وسلم نے فرمایا:) ”نہیں، جب تک اس (دوسرے مرد) سے لذت حاصل نہ کرے۔“ [سنن ابن ماجه/كتاب النكاح/حدیث: 1933]