حضرت ابوسعید رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم نے ”سینگوں والے نر مینڈھے کی قربانی دی، وہ «يَأْكُلُ فِي سَوَادٍ، وَيَطَأُ فِي سَوَادٍ، وَيَنْظُرُ فِي سَوَادٍ» ”سیاہی کھاتا، سیاہی میں چلتا اور سیاہی میں دیکھتا تھا“۔“ [سنن ابن ماجه/كِتَابُ الْأَضَاحِي/حدیث: 3128]

حضرت یونس بن میسرہ بن حلبس رحمہ اللہ سے روایت ہے، انہوں نے کہا: ”میں اللہ کے رسول صلی اللہ علیہ وسلم کے صحابی حضرت ابوسعید زرقی رضی اللہ عنہ کے ساتھ قربانی کے جانور خریدنے گیا۔“ یونس بن میسرہ بیان کرتے ہیں کہ حضرت ابوسعید رضی اللہ عنہ نے ایک ایسے مینڈھے کی طرف اشارہ کیا جس کے کانوں اور گلے کا کچھ حصہ سیاہ تھا، وہ جسمانی طور پر نہ زیادہ اونچا تھا نہ زیادہ پست تھا۔ انہوں نے فرمایا: ”میرے لیے یہ خرید لو۔“ گویا انہوں نے اسے رسول اللہ صلی اللہ علیہ وسلم کے مینڈھے کے مشابہ قرار دیا۔ [سنن ابن ماجه/كِتَابُ الْأَضَاحِي/حدیث: 3129]

حضرت ابو امامہ باہلی رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”بہترین کفن وہ ہے جو ایک رنگ کی دو چادروں پر مشتمل ہو اور بہترین قربانی سینگوں والا مینڈھا ہے۔“ [سنن ابن ماجه/كِتَابُ الْأَضَاحِي/حدیث: 3130]