حضرت عبد اللہ بن عمر رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”ہمارے لیے دو مری ہوئی چیزیں حلال کر دی گئی ہیں؛ مچھلی اور ٹڈی۔“ [سنن ابن ماجه/كتاب الصيد/حدیث: 3218]

حضرت سلمان رضی اللہ عنہ سے روایت ہے کہ رسول اللہ صلی اللہ علیہ وسلم سے ٹڈی دل کے بارے میں سوال کیا گیا تو آپ صلی اللہ علیہ وسلم نے فرمایا: ”یہ اللہ کا سب سے زیادہ تعداد والا لشکر ہے۔ میں اسے نہ کھاتا ہوں، نہ حرام کہتا ہوں۔“ [سنن ابن ماجه/كتاب الصيد/حدیث: 3219]

حضرت انس بن مالک رضی اللہ عنہ سے روایت ہے، انہوں نے فرمایا: ”نبی صلی اللہ علیہ وسلم کی ازواج مطہرات رضی اللہ عنہن ایک دوسری کو ٹڈیوں کی پلیٹیں تحفے کے طور پر بھیجا کرتی تھیں۔“ [سنن ابن ماجه/كتاب الصيد/حدیث: 3220]

حضرت جابر اور حضرت انس بن مالک رضی اللہ عنہما سے روایت ہے کہ نبی صلی اللہ علیہ وسلم جب ٹڈی دل کے خلاف بدعا فرماتے تو یوں کہتے: «اللَّهُمَّ أَهْلِكْ كِبَارَهُ، وَاقْتُلْ صِغَارَهُ، وَأَفْسِدْ بَيْضَهُ، وَاقْطَعْ دَابِرَهُ، وَخُذْ بِأَفْوَاهِهِ عَنْ مَعَاشِنَا وَأَرْزَاقِنَا، إِنَّكَ سَمِيعُ الدُّعَاءِ» ”اے اللہ! بڑی ٹڈیوں کو تباہ کر دے، اور چھوٹی ٹڈیوں کو مار ڈال، ان کے انڈے خراب کر دے، ان کی جڑ کاٹ دے، ان کے منہ ہماری روزی اور ہمارا رزق کھانے سے بند کر دے، بے شک تو دعا سننے والا ہے۔“ ایک آدمی نے عرض کیا: ”اے اللہ کے رسول صلی اللہ علیہ وسلم ! آپ کس طرح اللہ کے ایک لشکر کی جڑ کاٹنے کی دعا کرتے ہیں؟“ آپ صلی اللہ علیہ وسلم نے فرمایا: ”ٹڈی دل سمندر میں ایک بڑی مچھلی کی چھینک سے پیدا ہوتا ہے۔“ (حدیث کے راوی) ہاشم بیان کرتے ہیں کہ زیاد بن عبداللہ رحمہ اللہ نے کہا: ”مجھے ایک آدمی نے بتایا کہ اس نے مچھلی کی چھینک سے ٹڈی کو بکھرتے دیکھا ہے۔“ [سنن ابن ماجه/كتاب الصيد/حدیث: 3221]

حضرت ابوہریرہ رضی اللہ عنہ سے روایت ہے، انہوں نے فرمایا: ہم لوگ نبی صلی اللہ علیہ وسلم کے ہمراہ حج یا عمرے کے لیے روانہ ہوئے۔ (راستے میں) ٹڈی کی ایک ٹکڑی سامنے سے آگئی۔ ہم انہیں اپنے کوڑوں اور جوتوں سے مارنے لگے تو نبی صلی اللہ علیہ وسلم نے فرمایا: ”اسے کھاؤ، یہ بھی سمندر کے شکار میں شامل ہے۔“ [سنن ابن ماجه/كتاب الصيد/حدیث: 3222]