حضرت ام جندب رضی اللہ عنہا سے روایت ہے، انہوں نے فرمایا: ”میں نے قربانی کے دن رسول اللہ صلی اللہ علیہ وسلم کو دیکھا کہ آپ صلی اللہ علیہ وسلم نے وادی کے نشیبی حصے میں کھڑے ہو کر بڑے جمرے پر کنکریاں ماریں، پھر واپس ہوئے۔ قبیلہ خثعم کی ایک خاتون آپ صلی اللہ علیہ وسلم کے پیچھے چل پڑی، اس کے پاس ایک بچہ تھا جسے آسیب کی شکایت تھی اور وہ بات نہیں کرتا تھا۔ اس خاتون نے عرض کی: ”اے اللہ کے رسول! یہ میرا بیٹا ہے اور میرے گھر میں یہی باقی بچا ہے اور اسے آسیب ہے، یہ کلام نہیں کرتا۔“ رسول اللہ صلی اللہ علیہ وسلم نے فرمایا: ”میرے پاس تھوڑا سا پانی لاؤ۔“ پانی لایا گیا۔ نبی صلی اللہ علیہ وسلم نے اپنے ہاتھ دھوئے اور کلی کی، پھر (یہ مستعمل پانی) اسے دے دیا اور فرمایا: ”کچھ پانی اسے پلا دینا، کچھ اس کے اوپر ڈال دینا، اور اس کے لیے اللہ سے شفا کی دعا کرنا۔“ حضرت ام جندب رضی اللہ عنہا نے فرمایا: میں اس عورت سے ملی اور کہا: ”اس میں سے تھوڑا سا (متبرک پانی) مجھے بھی دے دو۔“ اس نے کہا: ”یہ تو اس بیمار کے لیے ہے۔“ حضرت ام جندب رضی اللہ عنہا نے فرمایا: ایک سال بعد اس عورت سے میری ملاقات ہو گئی تو میں نے اس لڑکے کے بارے میں پوچھا۔ اس نے کہا: ”وہ صحت یاب ہو گیا ہے اور ایسا عقل مند ہو گیا ہے جو (عام) لوگوں کی طرح نہیں (بلکہ ان سے بڑھ کر عقل مند ہو گیا ہے)۔““ [سنن ابن ماجه/كتاب الطب/حدیث: 3532]

حضرت علی رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ” «خَيْرُ الدَّوَاءِ الْقُرْآنُ» ”سب سے بہتر دوا قرآن ہے۔“” [سنن ابن ماجه/كتاب الطب/حدیث: 3533]