حضرت سہل بن سعد ساعدی رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم کے پاس سے ایک آدمی گزرا۔ نبی صلی اللہ علیہ وسلم نے فرمایا: ”تم اس شخص کے بارے میں کیا کہتے ہو؟“ انہوں نے عرض کیا: ”اس کے بارے میں آپ کی رائے زیادہ صحیح ہے۔ ہم تو (اپنی معلومات کے مطابق) یہ کہتے ہیں: یہ شخص معزز (دولت مند) افراد میں سے ہے۔ اس کے بارے میں یہی توقع ہے کہ اگر (کسی گھرانے میں) نکاح کا پیغام دے تو اس کا پیغام قبول کیا جائے، اگر (کسی کی) سفارش کرے تو اس کی سفارش قبول کی جائے، اور اگر بات کرے تو اس کی بات سنی جائے (اور اسے اہمیت دی جائے)۔“ نبی صلی اللہ علیہ وسلم خاموش ہو گئے۔ (پھر) ایک اور آدمی گزرا تو نبی صلی اللہ علیہ وسلم نے فرمایا: ”اس شخص کے بارے میں تم کیا کہتے ہو؟“ انہوں نے کہا: ”اللہ کے رسول صلی اللہ علیہ وسلم ! قسم ہے اللہ کی! ہم تو کہتے ہیں کہ یہ ایک غریب مسلمان ہے۔ اس کے بارے میں توقع ہے کہ اگر نکاح کا پیغام دے تو اسے رشتہ نہ دیا جائے۔ اگر سفارش کرے تو اس کی سفارش قبول نہ کی جائے۔ اگر بات کرے تو اس کی بات نہ سنی جائے۔“ نبی صلی اللہ علیہ وسلم نے فرمایا: ”یہ (غریب مسلمان) اس (پہلے) شخص جیسے زمین بھر آدمیوں سے بہتر ہے۔“ [سنن ابن ماجه/كتاب الزهد/حدیث: 4120]

حضرت عمران بن حصین رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”اللہ تعالیٰ اپنے مومن، تنگ دست، سوال سے بچنے والے، بال بچوں والے بندے سے محبت فرماتا ہے۔“ [سنن ابن ماجه/كتاب الزهد/حدیث: 4121]