حضرت ابو ذر رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: اللہ تبارک وتعالیٰ فرماتا ہے: ”اے میرے بندو! تم سب گناہ کرنے والے ہو، سوائے اس کے جسے میں محفوظ رکھوں، اس لیے مجھ سے بخشش طلب کرو، میں تمہیں بخش دوں گا۔ تم میں سے جو کوئی یہ یقین رکھے کہ میں بخشنے کی قدرت رکھتا ہوں، پھر وہ مجھ سے میری قدرت کے واسطے سے بخشش کی درخواست کرے تو میں اس کی مغفرت کر دوں گا۔ تم سب راہ بھولے ہوئے ہو، سوائے اس کے جسے میں ہدایت دوں، چنانچہ مجھ سے ہدایت مانگو میں تمہیں ہدایت دوں گا۔ تم سب فقیر (محتاج اور مفلس) ہو، سوائے اس کے جسے میں غنی کر دوں، لہٰذا مجھ سے مانگو میں تمہیں رزق دوں گا۔ اگر تمہارے زندہ، فوت شدہ، پہلے اور پچھلے، تر اور خشک اکٹھے ہو کر میرے بندوں میں سے سب سے زیادہ متقی انسان جیسے دل والے بن جائیں تو اس سے میری بادشاہت میں مچھر کے پر جتنا بھی اضافہ نہیں ہو گا۔ اور اگر وہ سب اکٹھے ہو کر میرے بندوں میں سب سے زیادہ بدنصیب (اور بدکار) بندے جیسے دل والے بن جائیں، اس سے میری بادشاہت میں مچھر کے پر جتنی کمی نہیں آئے گی۔ اگر تمہارے زندہ، فوت شدہ، پہلے اور پچھلے، تر اور خشک اکٹھے ہو کر (مجھ سے سوال کریں اور) ہر مانگنے والا وہ سب کچھ مانگ لے جس کی وہ (زیادہ سے زیادہ) تمنا کر سکتا ہے، تو اس سے میری بادشاہت میں اتنی ہی کمی نہیں آئے گی، جیسے کوئی سمندر کے کنارے پر جائے اور اس میں ایک سوئی ڈبو کر نکال لے؛ کیونکہ میں سخی اور عظمتوں والا ہوں، میری عطا کلام کرنا ہے۔ جب میں کسی چیز کا ارادہ کروں تو اسے صرف یہ کہتا ہوں: «كُنْ» ”ہو جا“ تو وہ ﴿فَيَكُونُ﴾ [سورة يس: 82] ”ہو جاتی ہے۔““ [سنن ابن ماجه/كتاب الزهد/حدیث: 4257]