حضرت عبداللہ بن عمر رضی اللہ عنہما سے روایت ہے، انہوں نے کہا: میں نے رسول اللہ صلی اللہ علیہ وسلم کو یہ فرماتے ہوئے سنا: ”تم میں سے جو شخص جمعہ کی نماز کے لیے آئے تو وہ غسل کرے۔“ [صحيح البخاري/كتاب الجمعة/حدیث: 894]

حضرت ابوسعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جمعہ کے دن غسل کرنا ہر بالغ مرد کے لیے ضروری ہے۔“ [صحيح البخاري/كتاب الجمعة/حدیث: 895]

حضرت ابوہریرہ رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”ہم بعد میں آئے ہیں لیکن قیامت کے دن سب سے آگے ہوں گے، فرق صرف اس قدر ہے کہ انہیں ہم سے پہلے کتاب دی گئی اور ہمیں بعد میں ملی، چنانچہ جمعہ کا یہ دن جس کے متعلق اہل کتاب نے اختلاف کیا لیکن اللہ تعالیٰ نے ہمیں اس کی رہنمائی کر دی، اس لیے کل کا دن یہود کے لیے اور پرسوں کا دن نصاریٰ کے لیے ہے۔“ پھر تھوڑی دیر خاموش رہے۔ [صحيح البخاري/كتاب الجمعة/حدیث: 896]

اس کے بعد رسول اللہ صلی اللہ علیہ وسلم نے فرمایا: ”ہر مسلمان کے لیے ضروری ہے کہ وہ سات دن میں ایک دن غسل کرے، جس میں اپنے سر اور جسم کو دھوئے۔“ [صحيح البخاري/كتاب الجمعة/حدیث: 897]

حضرت ابوہریرہ رضی اللہ عنہ ہی سے روایت ہے، انہوں نے کہا کہ نبی صلی اللہ علیہ وسلم نے فرمایا: ”اللہ تعالیٰ کا ہر مسلمان پر یہ حق ہے کہ وہ ہر سات دن میں ایک دن ضرور غسل کرے۔“ [صحيح البخاري/كتاب الجمعة/حدیث: 898]

حضرت ابن عمر رضی اللہ عنہما سے روایت ہے، وہ نبی صلی اللہ علیہ وسلم سے بیان کرتے ہیں کہ آپ نے فرمایا: ”رات کے وقت عورتوں کو مسجد میں جانے کی اجازت دے دو۔“ [صحيح البخاري/كتاب الجمعة/حدیث: 899]

حضرت ابن عمر رضی اللہ عنہما ہی سے روایت ہے، انہوں نے فرمایا کہ حضرت عمر رضی اللہ عنہ کی زوجہ محترمہ فجر اور عشاء کی نماز ادا کرنے کے لیے مسجد میں جاتیں اور جماعت میں شریک ہوتی تھیں۔ ان سے کہا گیا کہ تم باہر کیوں نکلتی ہو جبکہ تمہیں معلوم ہے کہ حضرت عمر رضی اللہ عنہ کو یہ ناگوار گزرتا ہے اور انہیں اس پر غیرت آتی ہے؟ زوجہ محترمہ نے جواب دیا کہ وہ مجھے روکتے کیوں نہیں ہیں، ان کے لیے کیا رکاوٹ ہے؟ انہوں نے کہا کہ رسول اللہ صلی اللہ علیہ وسلم کا یہ فرمان باعث رکاوٹ ہے: ”اللہ کی بندیوں کو اللہ کی مسجدوں سے مت روکو۔“ [صحيح البخاري/كتاب الجمعة/حدیث: 900]

حضرت عبداللہ بن حارث رضی اللہ عنہ جو محمد بن سیرین کے چچا زاد ہیں، سے روایت ہے کہ حضرت عبداللہ بن عباس رضی اللہ عنہما نے بارش کے وقت اپنے مؤذن سے کہا کہ «أَشْهَدُ أَنَّ مُحَمَّدًا رَسُولُ اللهِ» کے بعد «حَيَّ عَلَى الصَّلَاةِ» مت کہنا بلکہ اس کے بجائے «صَلُّوا فِي بُيُوتِكُمْ» کہنا، یعنی ”اپنے گھروں میں نماز پڑھ لو۔“ لوگوں نے اس پر تعجب کیا تو انہوں نے فرمایا کہ ایسا اس شخصیت صلی اللہ علیہ وسلم نے کیا تھا جو مجھ سے کہیں بہتر تھی۔ نماز جمعہ اگرچہ فرض ہے لیکن مجھے یہ پسند نہیں کہ تمہیں (تنگی میں مبتلا کرتے ہوئے) اس حالت میں گھروں سے نکالوں کہ تم کیچڑ اور پھسلن میں پھسلتے رہو۔ [صحيح البخاري/كتاب الجمعة/حدیث: 901]