حضرت یحییٰ بن سعید سے روایت ہے کہ پہنچا ان کو کہ سیدنا ابوذر رضی اللہ عنہ کہتے تھے: کنکریوں کا ایک بار ہٹانا درست ہے، اور نہ ہٹانا سرخ اونٹوں سے بہتر ہے۔ [موطا امام مالك رواية يحييٰ/حدیث: 374]

حضرت نافع سے روایت ہے کہ سیدنا عمر بن خطاب رضی اللہ عنہ لوگوں کو صفیں برابر کرنے کا حکم دیتے تھے، جب وہ لوگ لوٹ کو خبر دیتے کہ صفیں برابر ہوگئیں، اس وقت تکبیر کہتے۔ [موطا امام مالك رواية يحييٰ/حدیث: 375]

حضرت مالک بن ابی عامر اصبحی سے روایت ہے کہ میں سیدنا عثمان بن عفان رضی اللہ عنہ کے ساتھ تھا، اتنے میں تکبیر ہوئی نماز کی اور میں ان سے باتیں کرتا رہا، اس لیے کہ میرا کچھ وظیفہ مقرر کریں، اور وہ برابر کر رہے تھے کنکریوں کو اپنے جوتوں سے، یہاں تک کہ آن پہنچے وہ لوگ جن کو صفیں برابر کرنے کے لیے مقرر کیا تھا، اور انہوں نے خبر دی ان کو اس بات کی کہ صفیں برابر ہو گئیں، تو کہا مجھ سے: شریک ہو جا صف میں، پھر تکبیر کہی۔ [موطا امام مالك رواية يحييٰ/حدیث: 376]

حضرت عبدالکریم سے روایت ہے کہ انہوں نے کہا: نبوت کی باتوں میں سے یہ بات ہے کہ جب تجھے حیاء نہ ہو تو جو جی چاہے کر، اور نماز میں داہنا ہاتھ بائیں ہاتھ پر رکھنا، اور روزہ جلدی افطار کرنا، اور سحری کھانے میں دیر کرنا (یعنی صبح کے قریب کھانا)۔ [موطا امام مالك رواية يحييٰ/حدیث: 377]

سیدنا سہل بن سعد ساعدی رضی اللہ عنہ سے روایت ہے کہ لوگ حکم کیے جاتے تھے نماز میں داہنا ہاتھ بائیں ہاتھ پر رکھنے کا۔ کہا ابوحازم نے کہ میں سمجھتا ہوں سیدنا سہل رضی اللہ عنہ اس حدیث کو مرفوع کرتے تھے۔ [موطا امام مالك رواية يحييٰ/حدیث: 378]

حضرت نافع سے روایت ہے کہ سیدنا عبداللہ بن عمر رضی اللہ عنہما قنوت نہیں پڑھتے تھے کسی نماز میں۔ [موطا امام مالك رواية يحييٰ/حدیث: 379]

حضرت عروہ بن زبیر سے روایت ہے کہ سیدنا عبداللہ بن ارقم رضی اللہ عنہ امامت کرتے تھے اپنے لوگوں کی، تو ایک دن نماز تیار ہوئی چلے گئے حاجت کو، پھر آئے اور بولے کہ سنا میں نے رسول اللہ صلی اللہ علیہ وسلم سے، فرماتے تھے: ”جب قصد کرے کوئی تم میں سے پاخانہ کا، تو پہلے پاخانہ کرے پھر نماز پڑھے۔“ [موطا امام مالك رواية يحييٰ/حدیث: 380]

حضرت زید بن اسلم بیان کرتے ہیں کہ سیدنا عمر بن خطاب رضی اللہ عنہ نے فرمایا: کوئی تم میں نماز نہ پڑھے جب وہ روکے ہو پیشاب یا پاخانہ کو۔ [موطا امام مالك رواية يحييٰ/حدیث: 381]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”فرشتے دعا کرتے ہیں اس شخص کے لیے جو بیٹھا رہے اس جگہ میں جہاں وہ نماز پڑھ چکا ہے جب تک اس کو حدث نہ ہو، کہتے ہیں: اے اللہ بخش دے اس کو، رحم کر اس پر۔“
امام مالک رحمہ اللہ نے فرمایا: حدث سے مراد وہ امر ہے جس سے وضو ٹوٹ جائے۔ [موطا امام مالك رواية يحييٰ/حدیث: 382]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”نماز ہی میں رہتا ہے وہ شخص جس کو نماز گھر جانے سے روکے رہے۔“ [موطا امام مالك رواية يحييٰ/حدیث: 383]