حضرت سعید بن جبیر (اس شخص کے بارے میں جسے پھوڑے، زخم یا مرض لاحق ہو، پھر وہ جنبی ہوجائے اور غسل کی طاقت نہ رکھتا ہو) فرماتے ہیں کہ وہ تیمم کرے۔ [مصنف ابن ابي شيبه/كتاب الطهارة/حدیث: 1081]

حضرت حکم مریض کے بارے میں جو جنبی ہوجائے اور غسل کرنے کی صورت میں جان جانے کا اندیشہ ہو فرماتے ہیں کہ وہ تیمم کرے۔ [مصنف ابن ابي شيبه/كتاب الطهارة/حدیث: 1082]

حضرت مجاہد (پھوڑوں کے شکار اور اس جیسے دوسرے معذورین جنہیں جان جانے کا اندیشہ ہو) فرماتے ہیں کہ یہ مسافر کی طرح ہیں اور تیمم کریں گے۔ [مصنف ابن ابي شيبه/كتاب الطهارة/حدیث: 1083]

حضرت عطاء فرماتے ہیں کہ رسول اللہ صلی اللہ علیہ وآلہ وسلم کے زمانے میں ایک شخص کو احتلام ہوگیا اس کے جسم پر پھوڑے پھنسیاں نکلے ہوئے تھے۔ لوگوں نے اسے غسل دیا تو اس کا انتقال ہوگیا جب حضور صلی اللہ علیہ وآلہ وسلم کو یہ بات پہنچی تو آپ نے فرمایا ”ان لوگوں نے اسے ضائع کیا اللہ انہیں ضائع کرے، انہوں نے اسے قتل کیا اللہ انہیں مار ڈالے۔“ [مصنف ابن ابي شيبه/كتاب الطهارة/حدیث: 1084]

حضرت علی رضی اللہ عنہ فرماتے ہیں کہ حضور صلی اللہ علیہ وآلہ وسلم سوائے حالت جنابت کے ہر حال میں ہمیں قرآن پڑھایا کرتے تھے۔ [مصنف ابن ابي شيبه/كتاب الطهارة/حدیث: 1085]

ایک اور سند سے یونہی منقول ہے۔ [مصنف ابن ابي شيبه/كتاب الطهارة/حدیث: 1086]

حضرت عمر فرماتے کہ جنبی قرآن نہ پڑھے۔ [مصنف ابن ابي شيبه/كتاب الطهارة/حدیث: 1087]

حضرت ابراہیم فرماتے ہیں کہ حضرت ابن مسعود دریائے فرات کی طرف جا رہے تھے اور ایک آدمی کو قرآن پڑھا رہے تھے۔ حضرت ابن مسعود نے پیشاب کیا تو وہ آدمی تلاوت سے رک گیا۔ حضرت ابن مسعود نے اس کی وجہ پوچھی تو کہنے لگا کہ آپ نے پیشاب کیا ہے۔ فرمایا میں جنبی تو نہیں ہوں۔ [مصنف ابن ابي شيبه/كتاب الطهارة/حدیث: 1088]

حضرت اسود فرماتے ہیں کہ جنبی قرآن کی تلاوت نہ کرے۔ [مصنف ابن ابي شيبه/كتاب الطهارة/حدیث: 1089]

حضرت مجاہد فرماتے ہیں جنبی قرآن کی تلاوت نہ کرے۔ [مصنف ابن ابي شيبه/كتاب الطهارة/حدیث: 1090]