حضرت زید بن اسلم فرماتے ہیں کہ اسلاف میں سے کوئی حالت جنابت میں وضو کر کے مسجد میں داخل ہوتا اور بیٹھ جاتا تھا۔ [مصنف ابن ابي شيبه/كتاب الطهارة/حدیث: 1571]

حضرت عطاء اللہ تعالیٰ کے اس قول کے بارے میں فرماتے ہیں { وَلاَ جُنُبًا إِلاَّ عَابِرِی سَبِیلٍ } جنبی مسجد سے گزر سکتا ہے۔ [مصنف ابن ابي شيبه/كتاب الطهارة/حدیث: 1572]

حضرت مسروق فرماتے ہیں کہ جنبی سوائے حالت مجبوری کے مسجد سے نہیں گزر سکتا۔ [مصنف ابن ابي شيبه/كتاب الطهارة/حدیث: 1573]

حضرت بکربن عبد اللہ فرماتے ہیں کہ میں نے حضرت حسن سے کہا کہ اگر میں جنبی ہو جاؤں تو مسجد سے گذر جاؤں یا عبد اللہ بن عمیر کے گھر کی طرف سے آؤں؟ فرمایا اگر مسجد کا راستہ قریب ہو تو مسجد سے گذر جاؤ۔ [مصنف ابن ابي شيبه/كتاب الطهارة/حدیث: 1574]

حضرت انس بن مالک رضی اللہ عنہ فرماتے ہیں کہ نبی کریم صلی اللہ علیہ وآلہ وسلم نے ایک رات میں ایک ہی غسل سے اپنی ازواج مطہرات سے ہم بستری فرمائی۔ [مصنف ابن ابي شيبه/كتاب الطهارة/حدیث: 1575]

حضرت ابو رافع کہتے ہیں کہ رسول اللہ صلی اللہ علیہ وآلہ وسلم نے ایک رات میں ایک سے زیادہ بیویوں سے ہم بستری فرمائی اور ہر ایک کے لئے الگ غسل فرمایا۔ میں نے عرض کیا یا رسول اللہ! اگر آپ ایک ہی غسل فرما لیتے تو کافی نہ تھا؟ فرمایا یہ عمل زیادہ پاکیزہ اور اچھا ہے، یا فرمایا زیادہ پاکیزہ اور صاف ستھرا ہے۔ [مصنف ابن ابي شيبه/كتاب الطهارة/حدیث: 1576]

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا کہ حضرت سلیمان بن داود نے فرمایا تھا کہ میں ایک رات میں سو عورتوں سے جماع کروں گا، ہر عورت سے ایک لڑکا پیدا ہوگا جو اللہ کے راستے میں جہاد کرے گا۔ [مصنف ابن ابي شيبه/كتاب الطهارة/حدیث: 1577]

حضرت ابن سیرین فرماتے ہیں کہ حضرت سعد بن مالک نے ایک رات میں اپنی نو باندیوں سے ہم بستری فرمائی۔ پھر دسویں کو جگایا لیکن خود سو گئے۔ اس باندی نے اس بات سے شرم محسوس کی کہ حضرت سعد بن مالک کو جگائے۔ [مصنف ابن ابي شيبه/كتاب الطهارة/حدیث: 1578]

حضرت ابراہیم کے نزدیک اس بات میں کوئی حرج نہیں کہ آدمی آٹے یا ستو سے اپنے ہاتھ صاف کرلے۔ [مصنف ابن ابي شيبه/كتاب الطهارة/حدیث: 1579]

حضرت ابو معشر کہتے ہیں کہ میں نے حضرت ابراہیم کے ساتھ مچھلی کھائی پھر انہوں نے میرے لئے ستو منگوائے اور میں نے اس سے اپنے ہاتھ صاف کئے۔ [مصنف ابن ابي شيبه/كتاب الطهارة/حدیث: 1580]