حضرت ابن مغفل سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ اگر کتا برتن میں منہ مار دے تو اسے سات مرتبہ دھوؤ اور آٹھویں مرتبہ اسے مٹی سے صاف کرو۔ [مصنف ابن ابي شيبه/كتاب الطهارة/حدیث: 1851]

حضرت حسن سے پوچھا گیا کہ اگر بارش کا کیچڑ کپڑوں پر لگ جائے تو اس کا کیا حکم ہے؟ فرمایا اگر چاہے تو اسے دھولے اور اگر چاہے تو چھوڑ دے، جب خشک ہوجائے تو کھرچ دے۔ [مصنف ابن ابي شيبه/كتاب الطهارة/حدیث: 1852]

حضرت منصور کہتے ہیں کہ میں نے حضرت مجاہد سے سوال کیا کہ اگر بارش کا کیچڑ کپڑوں پر لگ جائے تو اس کا کیا حکم ہے؟ فرمایا کہ جب خشک ہوجائے تو اسے کھرچ دو۔ [مصنف ابن ابي شيبه/كتاب الطهارة/حدیث: 1853]

حضرت حجاج بن دینار فرماتے ہیں کہ میں نے ابو جعفر سے سوال کیا کہ اگر بارش کا کیچڑ میرے کپڑوں پر لگ جائے تو اس کا کیا حکم ہے؟ فرمایا پاک زمین ناپاک زمین کو پاک کردیتی ہے۔ [مصنف ابن ابي شيبه/كتاب الطهارة/حدیث: 1854]

حضرت عطاء فرماتے ہیں کہ حضرت عبید بن عمیر کے سر پر بالوں کے دو گچھے تھے۔ وہ جب وضو کرتے تو ان پر مسح کیا کرتے تھے۔ [مصنف ابن ابي شيبه/كتاب الطهارة/حدیث: 1855]

حضرت ابراہیم فرماتے ہیں کہ تم اپنے سر کے کسی بھی حصہ پر مسح کرلو جائز ہے۔ [مصنف ابن ابي شيبه/كتاب الطهارة/حدیث: 1856]

حضرت شعبی فرماتے ہیں کہ تم اپنے سر کے کسی بھی حصہ پر مسح کرلو جائز ہے۔ [مصنف ابن ابي شيبه/كتاب الطهارة/حدیث: 1857]

حضرت عطاء فرماتے ہیں کہ حضور صلی اللہ علیہ وآلہ وسلم نے اپنے سر کے اگلے حصہ پر مسح فرمایا۔ [مصنف ابن ابي شيبه/كتاب الطهارة/حدیث: 1858]

حضرت خالد حذاء فرماتے ہیں کہ مجھے یہ بات پہنچی ہے کہ حضرت ابن عمر رضی اللہ عنہما فرمایا کرتے تھے کہ اسے اتنا پانی کافی ہے۔ اور انہوں نے بیان کیا کہ وہ دونوں ہاتھ پانی میں ڈبوتے، پھر سر کا مسح اس طرح کرتے کہ اپنی ہتھیلیوں کو سر کے درمیان میں رکھا پھر انہیں سر کے اگلے حصہ کی طرف پھیرلیا۔ [مصنف ابن ابي شيبه/كتاب الطهارة/حدیث: 1859]

حضرت اشعث فرماتے ہیں کہ میں نے ابن سیرین سے اس شخص کے بارے میں سوال کیا جو اپنے اس کمرے میں پیشاب کرے جس میں نماز پڑھتا ہے؟ تو انہوں نے اسے مکروہ خیال فرمایا۔ میں نے حسن سے اس بارے میں سوال کیا تو انہوں نے فرمایا کہ ہاں (کرسکتا ہے) لیکن وہ پیشاب کو کمرے میں نہ چھوڑے۔ [مصنف ابن ابي شيبه/كتاب الطهارة/حدیث: 1860]