حضرت مصعب بن سعد فرماتے ہیں کہ سر کا مسح کرنے کے لئے نیا پانی لو۔ [مصنف ابن ابي شيبه/كتاب الطهارة/حدیث: 211]

حضرت ربیع فرماتی ہیں کہ نبی کریم صلی اللہ علیہ وآلہ وسلم ہمارے ہاں تشریف لائے اور آپ نے وضو فرمایا، وضو میں آپ نے سر کے مسح کے لئے نیا پانی نہیں لیا بلکہ ہاتھوں پر موجود پانی سے سر کا مسح فرمایا۔ [مصنف ابن ابي شيبه/كتاب الطهارة/حدیث: 212]

حضرت ہشام اپنے والد سے اور حضرت حمید حسن سے روایت کرتے ہیں کہ یہ دونوں حضرات ہاتھوں پر لگے ہوئے پانی سے سر کا مسح فرمایا کرتے تھے۔ [مصنف ابن ابي شيبه/كتاب الطهارة/حدیث: 213]

حضرت ابو جعفر فرماتے ہیں کہ نبی کریم صلی اللہ علیہ وآلہ وسلم ہاتھوں پر بچے ہوئے پانی سے سر کا مسح فرمایا کرتے تھے۔ [مصنف ابن ابي شيبه/كتاب الطهارة/حدیث: 214]

حضرت ابراہیم فرماتے ہیں کہ جو شخص سر کا مسح کرنا بھول گیا لیکن اس کی داڑھی میں تری موجود تھی اور وہ نماز کی حالت میں ہو تو اسے چاہئے کہ داڑھی کی تری سے سر کا مسح کر لے۔ [مصنف ابن ابي شيبه/كتاب الطهارة/حدیث: 215]

حضرت عطاء کہتے ہیں کہ جس شخص کو وضو میں سر کا مسح کرنا یاد نہ رہا لیکن اس کی داڑھی میں تری موجود تھی تو اس کے لئے کافی ہے کہ اسی تری سے سر کا مسح کر لے۔ [مصنف ابن ابي شيبه/كتاب الطهارة/حدیث: 216]

حضرت ہشام نے حسن سے اور حضرت اعمش نے ابراہیم سے اسی کے مثل روایت کیا ہے۔ [مصنف ابن ابي شيبه/كتاب الطهارة/حدیث: 217]

حضرت حسن بصری ایسے شخص کے بارے میں فرماتے ہیں جسے نماز میں یاد آیا کہ اس نے سر کا مسح نہیں کیا لیکن اس کی داڑھی میں تری موجود تھی کہ وہ داڑھی کی تری سے سر کا مسح کر لے۔ [مصنف ابن ابي شيبه/كتاب الطهارة/حدیث: 218]

حضرت علی رضی اللہ عنہ فرماتے ہیں کہ جو شخص وضو میں سر کا مسح کرنا بھول گیا لیکن اس کی داڑھی میں تری موجود تھی تو اسے چاہئے کہ داڑھی کی تری سے سر کا مسح کر لے۔ [مصنف ابن ابي شيبه/كتاب الطهارة/حدیث: 219]

حضرت بلال فرماتے ہیں کہ نبی کریم صلی اللہ علیہ وآلہ وسلم نے موزوں اور پگڑی پر مسح فرمایا۔ [مصنف ابن ابي شيبه/كتاب الطهارة/حدیث: 220]