حضرت عائشہ رضی اللہ عنہا (اس شخص کے بارے میں جو جنبی ہو اور سونا چاہے) فرماتی ہیں کہ وہ وضو یا تیمم کرلے۔ [مصنف ابن ابي شيبه/كتاب الطهارة/حدیث: 681]

حضرت عمر نے نبی کریم صلی اللہ علیہ وآلہ وسلم سے سوال کیا کہ کیا میں حالت جنابت میں سو سکتا ہوں؟ آپ نے فرمایا وضو کر کے سو سکتے ہو۔ [مصنف ابن ابي شيبه/كتاب الطهارة/حدیث: 682]

حضرت عمار فرماتے ہیں کہ نبی کریم صلی اللہ علیہ وآلہ وسلم نے جنبی کو رخصت دی ہے کہ وہ وضو کر کے کھا پی اور سو سکتا ہے۔ [مصنف ابن ابي شيبه/كتاب الطهارة/حدیث: 683]

حضرت غضیف بن حارث کہتے ہیں کہ میں نے حضرت عائشہ رضی اللہ عنہا سے پوچھا کہ نبی کریم صلی اللہ علیہ وآلہ وسلم رات کے ابتدائی حصہ میں غسل جنابت فرماتے یا رات کے آخری حصہ میں؟ انہوں نے فرمایا کہ کبھی ابتدائی حصہ میں اور کبھی آخری حصہ میں۔ [مصنف ابن ابي شيبه/كتاب الطهارة/حدیث: 684]

حضرت حذیفہ رضی اللہ عنہ فرماتے ہیں کہ غسل سے پہلے سو جانا (مادے کے) پوری طرح نکل جانے کے لئے زیادہ مفید ہے۔ [مصنف ابن ابي شيبه/كتاب الطهارة/حدیث: 685]

حضرت حذیفہ رضی اللہ عنہ فرماتے ہیں کہ جنابت کے بعد سو جانا غسل کو زیادہ کامل بنا دیتا ہے۔ [مصنف ابن ابي شيبه/كتاب الطهارة/حدیث: 686]

حضرت عائشہ رضی اللہ عنہا فرماتی ہیں کہ جب رسول اللہ صلی اللہ علیہ وآلہ وسلم کو اپنی کسی زوجہ سے حاجت ہوتی تو آپ اس حاجت کو پورا فرماتے اور پھر پانی کو چھوئے بغیر سو جاتے۔ [مصنف ابن ابي شيبه/كتاب الطهارة/حدیث: 687]

حضرت ابن عباس رضی اللہ عنہما فرماتے ہیں کہ جب آدمی اپنی بیوی سے جماع کرے اور دوبارہ کرنا چاہے تو غسل کو مؤخر کرنے میں کوئی حرج نہیں۔ [مصنف ابن ابي شيبه/كتاب الطهارة/حدیث: 688]

حضرت میمونہ فرماتی ہیں کہ میں نے حضور صلی اللہ علیہ وآلہ وسلم کے لئے غسل کا پانی رکھا۔ آپ نے جنابت کا غسل اس طرح فرمایا کہ بائیں ہاتھ سے برتن کو دائیں ہاتھ پر جھکایا اور اپنی دونوں ہتھیلیوں کو دھویا، پھر شرم گاہ پر پانی بہا کر اسے دھویا، پھر ہاتھ کو زمین پر ملا۔ پھر کلی کی، پھر ناک میں پانی ڈالا، پھر اپنے چہرے اور بازوؤں کو دھویا۔ پھر اپنے سر پر پانی ڈالا، پھر اپنے سارے جسم پر پانی ڈالا۔ پھر نہانے کی جگہ سے پیچھے ہٹ کر پاؤں دھوئے۔ فرماتی ہیں: میں آپ کے لئے کپڑا لائی تو آپ نے واپس کردیا اور ہاتھ سے اس طرح پانی جھاڑنے لگے۔ [مصنف ابن ابي شيبه/كتاب الطهارة/حدیث: 689]

حضرت عائشہ رضی اللہ عنہا فرماتی ہیں کہ نبی کریم صلی اللہ علیہ وآلہ وسلم نے غسل جنابت اس طرح فرمایا کہ پہلے دونوں ہتھیلیوں کو تین تین مرتبہ دھویا، پھر نماز والا وضو فرمایا۔ پھر اپنے ہاتھ کو بالوں پر رکھ کر انگلیوں سے اس طرح خلال کیا کہ پانی کھال تک پہنچ گیا۔ پھر اپنے سر پر تین مرتبہ پانی بہایا، پھر اپنے جسم پر پانی بہایا۔ [مصنف ابن ابي شيبه/كتاب الطهارة/حدیث: 690]