حضرت ابو موسیٰ، حضرت انس اور حارث ہمدانی دودھ پی کر کلی کیا کرتے تھے۔ [مصنف ابن ابي شيبه/كتاب الطهارة/حدیث: 641]

حضرت ابو سعید فرماتے ہیں کہ صرف دودھ پی کر وضو کرنا لازم ہے (کسی اور چیز سے نہیں) کیونکہ یہ خون اور لید کے درمیان سے نکلتا ہے۔ [مصنف ابن ابي شيبه/كتاب الطهارة/حدیث: 642]

حضرت ابوہریرہ فرماتے ہیں کہ صرف دودھ پینے سے وضو لازم ہے۔ [مصنف ابن ابي شيبه/كتاب الطهارة/حدیث: 643]

حضرت قاسم سے دودھ پینے کے بعد کلی یا وضو کے بارے میں سوال کیا گیا تو انہوں نے فرمایا کہ اس میں کوئی حرج نہیں۔ [مصنف ابن ابي شيبه/كتاب الطهارة/حدیث: 644]

حضرت ابن واثلہ فرماتے ہیں کہ ایک مرتبہ حضرت حذیفہ رضی اللہ عنہ نے دودھ منگوایا، انہوں نے بھی پیا اور میں نے بھی پیا، پھر انہوں نے پانی منگوایا جس سے انہوں نے بھی کلی کی اور میں نے بھی کلی کی۔ [مصنف ابن ابي شيبه/كتاب الطهارة/حدیث: 645]

حضرت ابن سیرین فرماتے ہیں کہ مجھے بتایا گیا کہ ایک مرتبہ حضرت ابن عباس رضی اللہ عنہما نے دودھ پیا تو لوگوں نے وضو یا کلی کا تذکرہ کیا۔ آپ نے فرمایا اس کی ضرورت نہیں، آسانی پیدا کرو تمہارے لئے بھی آسانی پیدا کی جائے گی۔ [مصنف ابن ابي شيبه/كتاب الطهارة/حدیث: 646]

حضرت مطرف ابن شخیر فرماتے ہیں کہ میں نے وضو کرنے کے بعد دودھ پیا پھر اس بارے میں حضرت ابن عباس رضی اللہ عنہما سے پوچھا تو انہوں نے فرمایا اس میں کوئی حرج نہیں، آسانی پیدا کرو تمہارے لئے آسانی کی جائے گی۔ [مصنف ابن ابي شيبه/كتاب الطهارة/حدیث: 647]

حضرت طلحہ کہتے ہیں کہ میں نے حضرت ابو عبد الرحمن سے دودھ پی کر وضو کے بارے میں پوچھا تو انہوں نے فرمایا کہ یہ تو پینے والوں کے لئے ایک خوش گوار مشروب ہے۔ [مصنف ابن ابي شيبه/كتاب الطهارة/حدیث: 648]

حضرت مسعر کہتے ہیں کہ میں نے حضرت جبلہ سے پوچھا کہ کیا آپ نے حضرت ابن عمر رضی اللہ عنہما کو یہ فرماتے ہوئے سنا ہے کہ میں گوشت کھاتا ہوں اور دودھ پیتا ہوں اور پھر وضو کئے بغیر نماز پڑھتا ہوں، انہوں نے کہا ہاں میں نے سنا ہے۔ [مصنف ابن ابي شيبه/كتاب الطهارة/حدیث: 649]

حضرت عطاء بن السائب کہتے ہیں کہ حضرت ابو عبد الرحمن مسجد میں تھے کہ مدرک بن عمارہ ان کے پاس دودھ لائے، انہوں نے دودھ پی لیا تو مدرک نے کہا یہ پانی ہے کلی کرلیجئے۔ وہ کہنے لگے کیوں کلی کروں، کیا خوش گوار اور پاکیزہ چیز پی کر کلی کروں؟! [مصنف ابن ابي شيبه/كتاب الطهارة/حدیث: 650]