حضرت عائشہ رضی اللہ عنہا فرماتی ہیں کہ جب حضور صلی اللہ علیہ وآلہ وسلم نے غسل جنابت کرنا ہوتا تو آپ کیلئے پانی کا برتن رکھا جاتا۔ آپ ہاتھوں کو پانی میں داخل کرنے سے پہلے دھوتے۔ جب ہاتھ دھو لیتے تو دایاں ہاتھ برتن میں داخل فرماتے۔ دائیں ہاتھ سے پانی لیتے اور بائیں ہاتھ سے شرمگاہ کو صاف کرتے۔ پھر دائیں ہاتھ سے پانی بائیں ہاتھ پر ڈال کر اسے دھوتے۔ پھر تین تین مرتبہ کلی کرتے اور ناک میں پانی ڈالتے پھر تین مرتبہ دونوں ہاتھ بھر کر سر پر پانی ڈالتے، پھر سارے جسم کو دھو لیتے۔ [مصنف ابن ابي شيبه/كتاب الطهارة/حدیث: 691]

حضرت عکرمہ فرماتے ہیں کہ حضرت عمر جب غسل جنابت فرماتے تو پہلے نچلے حصے کو دھوتے، پھر نماز والا وضو کرتے پھر سارے جسم پر پانی بہاتے۔ [مصنف ابن ابي شيبه/كتاب الطهارة/حدیث: 692]

حضرت ابن عمر رضی اللہ عنہما غسل جنابت کے بارے میں فرماتے ہیں کہ پہلے نماز والا وضو کرے، پھر گندگی کو زائل کرے، پھر ہاتھ کو زمین پر رگڑ کر صاف کرے، پھر سارے جسم پر پانی بہائے۔ [مصنف ابن ابي شيبه/كتاب الطهارة/حدیث: 693]

حضرت عبد الرحمن بن ابی لیلیٰ سے غسل جنابت کے بارے میں سوال کیا گیا تو آپ نے فرمایا کہ پہلے اپنی دونوں ہتھیلیوں کو دھو لو، پھر دائیں ہاتھ سے بائیں ہاتھ پر پانی ڈالو، پھر اپنی شرم گاہ کو دھوؤ، پھر دونوں ہاتھوں کو دھوؤ، پھر نماز والا وضو کرلو۔ [مصنف ابن ابي شيبه/كتاب الطهارة/حدیث: 694]

حضرت ابراہیم تیمی غسل جنابت کے بارے میں فرماتے ہیں کہ سب سے پہلے دائیں ہاتھ کو دھوئے، پھر دائیں ہاتھ سے بائیں پر پانی ڈالے، پھر شرمگاہ پر لگی نجاست کو صاف کرے، پھر اپنے ہاتھ کو دیوار سے رگڑے، پھر وضو کرے۔ [مصنف ابن ابي شيبه/كتاب الطهارة/حدیث: 695]

ابراہیم فرماتے ہیں کہ کہا جاتا تھا کہ پاکی غسل سے پہلے ہوگی۔ [مصنف ابن ابي شيبه/كتاب الطهارة/حدیث: 696]

حضرت سعید بن مسیب غسل جنابت کے بارے میں فرماتے ہیں کہ جب تم اپنے ہاتھ دھو لو تو پھر دونوں میں سے جس سے چاہو شروع کرو۔ [مصنف ابن ابي شيبه/كتاب الطهارة/حدیث: 697]

حضرت شعبی کے نزدیک غسل جنابت میں وضو نہیں ہے۔ [مصنف ابن ابي شيبه/كتاب الطهارة/حدیث: 698]

حضرت عاصم بن عمرو فرماتے ہیں کہ اہل عراق کا ایک وفد حضرت عمر کی خدمت میں حاضر ہوا اور آپ سے غسل جنابت کے بارے میں پوچھا۔ آپ نے فرمایا تم نے مجھ سے ایسی بات کے بارے میں پوچھا ہے جس کے بارے میں اس وقت سے مجھ سے کسی نے نہیں پوچھا جب سے میں نے رسول اللہ صلی اللہ علیہ وآلہ وسلم سے اس کے بارے میں سوال کیا ہے غسل جنابت میں وہ وضو کرو جو تم نماز کے لئے کرتے ہو۔ [مصنف ابن ابي شيبه/كتاب الطهارة/حدیث: 699]

حضرت جبیر بن مطعم فرماتے ہیں کہ نبی کریم صلی اللہ علیہ وآلہ وسلم کے پاس کچھ لوگوں کا غسل جنابت کے بارے میں اختلاف ہوگیا۔ ایک آدمی نے کہا کہ میں اپنے سر کو اتنا اتنا دھوتا ہوں حضور صلی اللہ علیہ وآلہ وسلم نے فرمایا کہ میں اپنے سر پر تین ہتھیلی پانی ڈالتا ہوں۔ [مصنف ابن ابي شيبه/كتاب الطهارة/حدیث: 700]