حضرت عبد اللہ فرماتے ہیں کہ اگر جنبی اپنے سر کو خطمی سے دھو لے تو یہ اس کے لئے کافی ہے۔ ابراہیم بھی یونہی فرماتے ہیں یا وہ کہتے ہیں کہ دوبارہ دھونے کی ضرورت نہیں۔ [مصنف ابن ابي شيبه/كتاب الطهارة/حدیث: 781]

حضرت عبد اللہ سے پوچھا گیا کہ اگر جنبی اپنے سر کو خطمی سے دھو لے تو کیا اس کے لئے کافی ہے؟ فرمایا کافی ہے دوبارہ سر دھونے کی ضرورت نہیں۔ [مصنف ابن ابي شيبه/كتاب الطهارة/حدیث: 782]

حضرت سعید بن جبیر سے پوچھا گیا کہ اگر کوئی شخص غسل جنابت میں بیری کے پانی سے سر دھو لے تو کیا کرے؟ فرمایا دوبارہ دھونے کی ضرورت نہیں۔ [مصنف ابن ابي شيبه/كتاب الطهارة/حدیث: 783]

حضرت ابو سلمہ فرماتے ہیں کہ اگر کوئی جنبی خطمی بوٹی سے سر دھو لے تو کافی ہے۔ [مصنف ابن ابي شيبه/كتاب الطهارة/حدیث: 784]

حضرت ضحاک سے بھی یونہی منقول ہے۔ [مصنف ابن ابي شيبه/كتاب الطهارة/حدیث: 785]

حضرت طلحہ یامی اسی کمرے میں غسل جنابت کرلیتے تھے جس میں رہتے تھے۔ [مصنف ابن ابي شيبه/كتاب الطهارة/حدیث: 786]

حضرت اوزاعی کہتے ہیں کہ میں نے زہری سے پوچھا کہ اگر ایک آدمی جنبی ہو اور اس کے پاس اتنا پانی ہو جس سے صرف وضو کرسکے تو وہ کیا کرے؟ فرمایا تیمم کرلے۔ عبدہ بن ابی لبابہ نے فرمایا کہ وہ وضو کرے اور تیمم کرے۔ [مصنف ابن ابي شيبه/كتاب الطهارة/حدیث: 787]

حضرت حسن سے پوچھا گیا کہ جنبی کے پاس غسل کی ضرورت کا پانی نہ ہو تو کیا کرے؟ فرمایا تیمم کرے۔ [مصنف ابن ابي شيبه/كتاب الطهارة/حدیث: 788]

حضرت ابن عباس رضی اللہ عنہما دورانِ غسل جنابت برتن میں گرنے والے چھینٹوں کے بارے میں فرماتے ہیں کہ ان میں کوئی حرج نہیں۔ [مصنف ابن ابي شيبه/كتاب الطهارة/حدیث: 789]

ابن عون کہتے ہیں کہ میں نے محمد سے کہا کہ غسل کرتے ہوئے میرے غسل کے چھینٹے برتن میں گرجاتے ہیں۔ فرمایا کیا تم اس سے بچنے کی کوئی صورت پاتے ہو؟ [مصنف ابن ابي شيبه/كتاب الطهارة/حدیث: 790]