ایک عورت نے ام سلمہ سے غسل جنابت کا پوچھا تو فرمایا کہ تین مرتبہ پانی بہا لو۔ اس نے کہا میرے بال زیادہ ہیں۔ فرمایا بال ایک دوسرے کے اوپر رکھ لو۔ [مصنف ابن ابي شيبه/كتاب الطهارة/حدیث: 801]

حضرت ابن عباس رضی اللہ عنہما فرماتے ہیں کہ مینڈیوں والی عورت کے لئے تین مرتبہ پانی بہانا کافی ہے۔ [مصنف ابن ابي شيبه/كتاب الطهارة/حدیث: 802]

حضرت ام سلمہ فرماتی ہیں کہ میں نے رسول اللہ صلی اللہ علیہ وآلہ وسلم سے پوچھا کہ میں مینڈیاں مضبوط باندھتی ہوں، غسل کرنے کے لئے میں کیا کروں؟ حضور صلی اللہ علیہ وآلہ وسلم نے فرمایا ”اپنے سر پر تین لپ پانی ڈالو، پھر ہر لپ کے بعد سر کو خوب اچھی طرح پانی سے تر کرو۔ [مصنف ابن ابي شيبه/كتاب الطهارة/حدیث: 803]

حضرت زہری اور حضرت عطاء فرماتے ہیں کہ عورت اپنے بال نہیں کھولے گی بلکہ اوپر تین مرتبہ پانی ڈالے گی پھر رگڑے گی۔ [مصنف ابن ابي شيبه/كتاب الطهارة/حدیث: 804]

حسن غسل کرنے والی عورت کے بارے میں فرماتے ہیں کہ اس کے لئے تین مرتبہ پانی ڈالنا کافی ہے۔ اگر چاہے تو مینڈیاں نہ کھولے۔ [مصنف ابن ابي شيبه/كتاب الطهارة/حدیث: 805]

حضرت شعبہ کہتے ہیں کہ میں نے حماد سے عورت کے غسل کے بارے میں سوال کیا تو فرمایا اگر پانی نیچے تک پہنچ سکتا ہے تو مینڈیاں نہ کھولے اور اگر نہیں پہنچتا تو کھول لے۔ حضرت حکم نے فرمایا کہ مینڈیوں کی جڑیں اور کنارے گیلے کرلے کھولنے کی ضرورت نہیں۔ [مصنف ابن ابي شيبه/كتاب الطهارة/حدیث: 806]

حضرت جابر فرماتے ہیں کہ حائضہ اور جنبی عورت اپنے سر پر پانی بہائے گی مینڈیاں نہیں کھولے گی۔ [مصنف ابن ابي شيبه/كتاب الطهارة/حدیث: 807]

حضرت حذیفہ رضی اللہ عنہ نے اپنی بیوی سے فرمایا اپنے سر میں پانی کا خلال کرلیا کرو تا کہ آگ خشک حصوں تک نہ پہنچ سکے۔ [مصنف ابن ابي شيبه/كتاب الطهارة/حدیث: 808]

حضرت عطاء اور حضرت زہری فرماتے ہیں کہ حیض اور جنابت کا غسل ایک جیسا ہے۔ [مصنف ابن ابي شيبه/كتاب الطهارة/حدیث: 809]

حضرت نافع فرماتے ہیں کہ حضرت ابن عمر رضی اللہ عنہما کی بیویاں اور ان کی اولاد کی مائیں (ام ولد باندیاں) حیض اور جنابت کے غسل کے لئے بالوں کو نہیں کھولتی تھیں البتہ انہیں خوب اچھی طرح تر کرتی تھیں۔ [مصنف ابن ابي شيبه/كتاب الطهارة/حدیث: 810]