حضرت ابو الجوزاء فرماتے ہیں کہ اگر غسل خانہ صاف ہو تو پاؤں دھونے کی ضرورت نہیں اور اگر صاف نہ ہو تو پاؤں دھونے چاہیں۔ [مصنف ابن ابي شيبه/كتاب الطهارة/حدیث: 771]

حضرت ابراہیم کے نزدیک غسل جنابت کی تفریق میں کوئی حرج نہیں۔ [مصنف ابن ابي شيبه/كتاب الطهارة/حدیث: 772]

حضرت حسن اس بات میں کوئی حرج نہیں سمجھتے تھے کہ آدمی غسل جنابت میں جسم سے پہلے سر دھو لے یا سر سے پہلے جسم دھو لے۔ [مصنف ابن ابي شيبه/كتاب الطهارة/حدیث: 773]

حضرت عبد الرحمن بن حرملہ فرماتے ہیں کہ میرے گھر والوں میں سے ایک آدمی نے غسل جنابت کیا لیکن وہ اپنا سر دھونا بھول گیا۔ اس نے مجھے کہا کہ میں سعید بن المسیب سے مسئلہ پوچھوں۔ میں نے ان سے دریافت کیا تو انہوں نے فرمایا کہ وہ واپس جا کر اپنا سر دھو لے۔ چنانچہ میں گیا اور وضو کا پانی اس پر ڈالتا رہا یہاں تک کہ اس نے اپنا سر دھو لیا۔ [مصنف ابن ابي شيبه/كتاب الطهارة/حدیث: 774]

حضرت زہری فرماتے ہیں کہ حضرت ابو سلمہ بن عبد الرحمن اپنی زوجہ سے چھپ کر باندی سے تعلق رکھتے تھے اور اس بات کو ناپسند خیال کرتے تھے کہ گھر والوں کو اس کا علم ہو۔ چناچہ وہ حلق تک غسل کرلیتے لیکن سر دھونا انہیں پسند نہ تھا کہ بال گیلے دیکھ کر گھر والوں کو اندازہ ہوجائے گا۔ پھر وہ گھر والوں کے پاس آتے اور کہتے میرے سر میں درد ہے، پھر خطمی نامی بوٹی منگوا کر سر دھو لیتے۔ [مصنف ابن ابي شيبه/كتاب الطهارة/حدیث: 775]

حضرت عبد اللہ فرماتے ہیں کہ جس شخص نے حالت جنابت میں اپنا سر خطمی نامی بوٹی سے دھویا اس نے اچھے طریقے سے غسل کرلیا۔ [مصنف ابن ابي شيبه/كتاب الطهارة/حدیث: 776]

حضرت جابر سے بھی یونہی منقول ہے۔ [مصنف ابن ابي شيبه/كتاب الطهارة/حدیث: 777]

حضرت علی رضی اللہ عنہ فرماتے ہیں کہ جس شخص نے غسل جنابت کرتے ہوئے اپنے سر کو کسی دھونے کی چیز سے دھویا اس نے بہت اچھا غسل کیا۔ [مصنف ابن ابي شيبه/كتاب الطهارة/حدیث: 778]

حضرت عبد اللہ فرماتے ہیں کہ جس شخص نے حالت جنابت میں اپنے سر کو خطمی بوٹی سے دھویا اس نے بہت اچھا غسل کیا۔ حضرت حارث یہ بھی فرماتے ہیں کہ خظمی بوٹی سے گرنے والے پانی کو اپنے سر پر دوبارہ نہ ڈالے۔ [مصنف ابن ابي شيبه/كتاب الطهارة/حدیث: 779]

حضرت ابن عباس رضی اللہ عنہما فرماتے ہیں کہ خطمی سے دھونے کے بعد سر کو دوبارہ دھونے کی ضرورت نہیں۔ [مصنف ابن ابي شيبه/كتاب الطهارة/حدیث: 780]