حضرت ابن عمر رضی اللہ عنہما جلدی جلدی اقامت کہتے تھے۔ [مصنف ابن ابي شيبه/كتاب الأذان والإقامة/حدیث: 2257]

ابراہیم فرماتے ہیں کہ اذان ٹھہر ٹھہر کر کہی جائے اور اقامت کے کلمات پے در پے تیز تیز کہے جائیں۔ [مصنف ابن ابي شيبه/كتاب الأذان والإقامة/حدیث: 2258]

مسلم بن ابی مریم کہتے ہیں کہ حضرت علی بن حسین رحمہ اللہ اذان دیا کرتے تھے، وہ جب حَیَّ عَلَی الْفَلاَحِ پر پہنچتے تو حَیَّ عَلَی خَیْرِ الْعَمَلِ کہا کرتے تھے اور فرماتے کہ پہلی اذان یہ تھی۔ [مصنف ابن ابي شيبه/كتاب الأذان والإقامة/حدیث: 2259]

حضرت ابن عمر رضی اللہ عنہما اپنی اذان میں الصَّلاَۃُ خَیْرٌ مِنَ النَّوْمِ کہا کرتے تھے اور کبھی حَیَّ عَلَی خَیْرِ الْعَمَلِ بھی کہتے تھے۔ [مصنف ابن ابي شيبه/كتاب الأذان والإقامة/حدیث: 2260]

حضرت ابن عمر رضی اللہ عنہما بعض اوقات اپنی اذان میں حَیَّ عَلَی خَیْرِ الْعَمَلِ کا اضافہ کیا کرتے تھے۔ [مصنف ابن ابي شيبه/كتاب الأذان والإقامة/حدیث: 2261]

عبدالعزیز بن رفیع کہتے ہیں کہ میں نے حضرت ابو محذورہ کو دیکھا کہ وہ آئے، جبکہ ایک آدمی اذان دے چکا تھا، انہوں نے اذان دی اور اقامت کہی۔ [مصنف ابن ابي شيبه/كتاب الأذان والإقامة/حدیث: 2262]

ایک صاحب روایت کرتے ہیں کہ حضرت ابن ام مکتوم اذان کہتے اور حضرت بلال اقامت کہتے تھے اور بعض اوقات حضرت بلال اذان دیتے اور حضرت ابن امِ مکتوم اقامت کہا کرتے تھے۔ [مصنف ابن ابي شيبه/كتاب الأذان والإقامة/حدیث: 2263]

حضرت حسن فرماتے ہیں کہ اس بات میں کوئی حرج نہیں کہ اذان کوئی دے اور اقامت کوئی دوسرا کہے۔ [مصنف ابن ابي شيبه/كتاب الأذان والإقامة/حدیث: 2264]

حضرت زہری سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ جس نے اذان دی ہے وہی اقامت کہے۔ [مصنف ابن ابي شيبه/كتاب الأذان والإقامة/حدیث: 2265]

حضرت زیاد بن حارث صدائی کہتے ہیں کہ میں نبی کریم صلی اللہ علیہ وآلہ وسلم کے ساتھ ایک سفر میں تھا۔ آپ صلی اللہ علیہ وآلہ وسلم نے مجھے حکم دیا تو میں نے اذان دی۔ حضرت بلال نے اقامت کہنے کا ارادہ کیا تو حضور صلی اللہ علیہ وآلہ وسلم نے فرمایا کہ صداء کے بھائی نے اذان دی ہے، جو اذان دے وہی اقامت کہے۔ چناچہ پھر میں نے اقامت کہی۔ [مصنف ابن ابي شيبه/كتاب الأذان والإقامة/حدیث: 2266]