حضرت حارث فرماتے ہیں کہ اگر مریض بیٹھ کر نماز پڑھنے پر قادر نہ ہو تو سیدھا لیٹ کر پڑھ لے اور اپنے پاؤں قبلہ کی طرف رکھے، اور اپنے چہرے کو قبلے کی طرف رکھ کر اشارے سے نماز پڑھے۔ [مصنف ابن ابي شيبه/كتاب الصلوات/حدیث: 2850]

حضرت مختار بن فلفل فرماتے ہیں کہ میں نے حضرت انس سے مریض کی نماز کا طریقہ دریافت کیا تو انہوں نے فرمایا کہ وہ بیٹھ کر نماز پڑھے اور زمین پر سجدہ کرے۔ [مصنف ابن ابي شيبه/كتاب الصلوات/حدیث: 2851]

حضرت عروہ فرماتے ہیں کہ مریض اشارے سے نماز پڑھے گا اور اپنے چہرے کی طرف کوئی چیز نہیں اٹھائے گا۔ [مصنف ابن ابي شيبه/كتاب الصلوات/حدیث: 2852]

حضرت ابو خشینہ کہتے ہیں کہ میں حضرت حکم بن اعرج کے ساتھ بکر مزنی کی بیماری میں ان کے پاس گیا، انہوں نے ہم سے پوچھا کہ کیا تم نے عصر کی نماز پڑھ لی؟ ہم نے کہا جی ہاں، اس پر وہ کھڑے ہوئے اور انہوں نے اپنی بیماری کی وجہ سے ہلکی نماز پڑھی۔ [مصنف ابن ابي شيبه/كتاب الصلوات/حدیث: 2853]

حضرت رجاء بن ربیعہ کہتے ہیں کہ ہم حضرت ابو سعید خدری کے مرض الوفات میں ان کے پاس تھے کہ ان پر بےہوشی طاری ہوگئی، جب انہیں افاقہ ہوا تو ہم نے ان سے کہا کہ اے ابو سعید! نماز کا وقت ہوگیا ہے! انہوں نے فرمایا کہ میرے لئے اشارہ کرنا کافی ہے۔
ابو بکر (ابن ابی شیبہ) فرماتے ہیں کہ ان کی مراد یہ تھی کہ وہ اشارے سے نماز پڑھیں گے۔ [مصنف ابن ابي شيبه/كتاب الصلوات/حدیث: 2854]

حضرت عاصم کہتے ہیں کہ ایک مرتبہ میں بیمار تھا کہ حضرت ابو وائل میرے پاس تشریف لائے، میں نے کہا کہ اے ابو وائل! میں ایک مستقل مریض ہوں تو کیا میں نماز پڑھوں گا۔ انہوں نے کہا جی ہاں۔ [مصنف ابن ابي شيبه/كتاب الصلوات/حدیث: 2855]

حضرت بکر بن عبد اللہ کہتے ہیں کہ حضرت عمر اس بات کو مکروہ خیال فرماتے تھے کہ آدمی لکڑی پر سجدہ کرے۔ [مصنف ابن ابي شيبه/كتاب الصلوات/حدیث: 2856]

حضرت علقمہ فرماتے ہیں کہ حضرت عبد اللہ اپنے بھائی عتبہ کی عیادت کے لئے گئے، دیکھا کہ وہ لکڑی پر نماز پڑھ رہے ہیں۔ انہوں نے لکڑی کو اٹھا کر پھینک دیا اور فرمایا کہ یہ چیز شیطان کی سجھائی ہوئی ہے۔ تم اپنے چہرے کو زمین پر رکھو اور اگر اس کی طاقت نہ ہو تو اشارے سے نماز پڑھ لو۔ [مصنف ابن ابي شيبه/كتاب الصلوات/حدیث: 2857]

حضرت ابن عون کہتے ہیں کہ حضرت محمد سے پوچھا گیا کہ کیا لکڑی پر نماز پڑھنا جائز ہے؟ آپ نے اسے مکروہ خیال فرمایا۔ [مصنف ابن ابي شيبه/كتاب الصلوات/حدیث: 2858]

حضرت شعبی کہتے ہیں کہ حضرت ابن مسعوداپنے بھائی عتبہ کی عیادت کے لئے تشریف لے گئے، وہ ایک مسواک کی لکڑی پر سجدہ کررہے تھے، حضرت ابن مسعود نے اس لکڑی کو پھینک دیا اور فرمایا کہ اشارے سے نماز پڑھو۔ [مصنف ابن ابي شيبه/كتاب الصلوات/حدیث: 2859]