حضرت صفوان سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ ظہر کی نماز کو ٹھنڈا کرکے پڑھا کرو کیونکہ گرمی کی شدت جہنم کی پھونک ہے۔ [مصنف ابن ابي شيبه/كتاب الصلوات/حدیث: 3319]

حضرت قیس فرماتے ہیں کہ کہا جاتا تھا کہ ظہر کو ٹھنڈا کرکے پڑھو کیونکہ اس وقت جہنم کے دروازے کھولے جاتے ہیں۔ [مصنف ابن ابي شيبه/كتاب الصلوات/حدیث: 3320]

حضرت عمر فرماتے ہیں کہ ظہر کو ٹھنڈا کرکے پڑھو کیونکہ گرمی کی شدت جہنم کی پھونک ہے۔ [مصنف ابن ابي شيبه/كتاب الصلوات/حدیث: 3321]

حضرت عبد اللہ نے فرمایا کہ ظہر کا اول وقت یہ ہے کہ تم اپنے قدموں کی طرف دیکھو، اگر تین سے پانچ قدموں کا اندازہ ہو تو یہ اول وقت ہے اور دوسرے وقت (یعنی عصر) کا اول وقت یہ ہے کہ تم اپنے پاؤں کو دیکھو اور پانچ سے سات قدموں کا اندازہ ہو۔ حضرت اسود بن یزید کہتے ہیں کہ میرے خیال میں یہ بات سردیوں کے بارے میں فرمائی۔ [مصنف ابن ابي شيبه/كتاب الصلوات/حدیث: 3322]

حضرت عمارہ فرماتے ہیں اسلاف ظہر کی نماز اس وقت پڑھتے تھے جبکہ سایہ ایک قامت (یعنی آدمی کے قد کے برابر) ہوتا تھا۔ [مصنف ابن ابي شيبه/كتاب الصلوات/حدیث: 3323]

ابراہیم فرماتے ہیں کہ جب کسی چیز کا سایہ تین ذراع ہو تو اس وقت ظہر کی نماز ادا کرنی چاہئے۔ اگر کسی آدمی کو جلدی ہو تو اس سے پہلے ادا کرلے اور اگر کوئی مجبوری ہو تو اس کے بعد ادا کرلے۔ زائدہ کہتے ہیں کہ میں نے منصور سے پوچھا کہ یہ ان کی مراد گرمیوں کے موسم میں نہیں تھی؟ تو انہوں نے جواب دیا کہ جی ہاں۔ [مصنف ابن ابي شيبه/كتاب الصلوات/حدیث: 3324]

ابراہیم فرماتے ہیں کہ کہا جاتا تھا کہ جب آدمی کا سایہ تین ذراع ہوجائے تو یہ ظہر کی نماز کا وقت ہے۔ [مصنف ابن ابي شيبه/كتاب الصلوات/حدیث: 3325]

حضرت ابو مجلز کہتے ہیں کہ میں نے حضرت ابن عمر رضی اللہ عنہما کے ساتھ نماز پڑھی اور میں نے ارادہ کیا کہ میں ان کی نماز کا اندازہ لگاؤں۔ میں نے نماز کے بعد اپنے سائے کو ناپا تو وہ تین ذراع تھا۔ [مصنف ابن ابي شيبه/كتاب الصلوات/حدیث: 3326]

حضرت حریث بن سائب کہتے ہیں کہ میں نے محمد بن سیرین سے ظہر کے وقت کے بارے میں سوال کیا تو انہوں نے فرمایا جب ہر چیز کا سایہ تین ذراع ہوجائے تو اس وقت ظہر کی نماز ادا کی جائے گی۔ [مصنف ابن ابي شيبه/كتاب الصلوات/حدیث: 3327]

حضرت حریث بن سائب کہتے ہیں کہ میں نے حضرت حسن سے ظہر کے وقت کے بارے میں سوال کیا تو انہوں نے فرمایا کہ جب کسی چیز کا سایہ اس کے طول سے زائل ہوجائے تو اس وقت ظہر کی نماز ادا کی جائے گی۔ [مصنف ابن ابي شيبه/كتاب الصلوات/حدیث: 3328]