ابراہیم فرماتے ہیں کہ اگر کسی شخص نے بغیر وضو ہونے کی حالت میں آیت سجدہ سنی تو وضو کرے۔ پھر آیت سجدہ پڑھے اور پھر سجدہ کرے۔ اگر وہ خود ٹھیک طرح سے نہ پڑھ سکتا ہو تو کوئی دوسری آیت پڑھے اور پھر سجدہ کرے۔ [مصنف ابن ابي شيبه/باب سجود التلاوة/حدیث: 4383]

حضرت شعبی اس شخص کے بارے میں جو بےوضو ہونے کی حالت میں آیت سجدہ پڑھے فرماتے ہیں کہ جہاں اس کا چہرہ ہو وہیں سجدہ کرلے۔ [مصنف ابن ابي شيبه/باب سجود التلاوة/حدیث: 4384]

حضرت ابراہیم اس شخص کے بارے میں جو آیت سجدہ سنے لیکن اس کا وضو نہ ہو فرماتے ہیں کہ اگر اس کے پاس پانی ہو تو وضو کرکے سجدہ کرے اور اگر اس کے پاس پانی نہ ہو تو تیمم کرکے سجدہ کرے۔ [مصنف ابن ابي شيبه/باب سجود التلاوة/حدیث: 4385]

حضرت ابن عباس رضی اللہ عنہما اس شخص کے بارے میں جو قبلے سے رخ ہٹا کر آیت سجدہ کی تلاوت کرے فرماتے ہیں کہ وہ سجدہ کرے گا اس میں کوئی حرج نہیں۔ [مصنف ابن ابي شيبه/باب سجود التلاوة/حدیث: 4386]

حضرت عطاء فرماتے ہیں کہ حضرت ابو عبد الرحمن چلتے ہوئے قبلے کے علاوہ کسی طرف رخ کرکے آیت سجدہ پڑھتے تھے اور پھر سر سے اشارہ کرکے سلام پھیر لیتے تھے۔ [مصنف ابن ابي شيبه/باب سجود التلاوة/حدیث: 4387]

حضرت سفیان بن حسین کہتے ہیں کہ حضرت حسن نے سورة ص کی آیت سجدہ پڑھی اور ایک ستون کے کنارے پر سجدہ کیا، پھر لوگوں سے فرمایا کہ قبلے کی طرف رخ کرلو۔ [مصنف ابن ابي شيبه/باب سجود التلاوة/حدیث: 4388]

حضرت ابوعبد الرحمن جب بیٹھ کر آیت سجدہ پڑھتے تو قبلہ رخ ہو کر سجدہ کیا کرتے تھے۔ [مصنف ابن ابي شيبه/باب سجود التلاوة/حدیث: 4389]

حضرت شعبی فرمایا کرتے تھے کہ اگر کوئی آدمی فجر اور عصر کے بعد آیت سجدہ کی تلاوت کرے تو سجدہ کرے گا۔ [مصنف ابن ابي شيبه/باب سجود التلاوة/حدیث: 4390]

حسن اور ابراہیم فرماتے ہیں کہ جب تم آیت سجدہ پڑھو تو جب تک وقت باقی ہو سجدہ کرلو، خواہ عصر کے بعد یا فجر کے بعد۔ [مصنف ابن ابي شيبه/باب سجود التلاوة/حدیث: 4391]

حضرت مغیرہ ابراہیم سے روایت کرتے ہیں کہ حسن اور ابراہیم دونوں نے فرمایا کہ جب تک وقت باقی ہو آیت سجدہ پڑھو اور سجدہ کرو، فجر کے بعد بھی اور عصر کے بعد بھی۔ [مصنف ابن ابي شيبه/باب سجود التلاوة/حدیث: 4392]