حضرت قتادہ فرماتے ہیں کہ اگر کوئی عورت آیت سجدہ پڑھے اور اس کے پاس ایک یا زیادہ مرد ہوں تو وہ اس سے پہلے سجدہ کرلیں اس کی اتباع نہ کریں۔ [مصنف ابن ابي شيبه/باب سجود التلاوة/حدیث: 4423]

حضرت مغیرہ کہتے ہیں کہ میں نے حضرت ابراہیم سے سوال کیا کہ اگر کوئی عورت آیت سجدہ کی تلاوت کرے تو ہمارے لئے کیا حکم ہے؟ انہوں نے فرمایا کہ وہ تمہاری امام ہے۔ یعنی تم بھی سجدہ کرو گے۔ [مصنف ابن ابي شيبه/باب سجود التلاوة/حدیث: 4424]

حضرت زید بن اسلم فرماتے ہیں کہ ایک لڑکے نے نبی پاک حضور صلی اللہ علیہ وآلہ وسلم کے پاس آیت سجدہ کی تلاوت کی۔ اس نے انتظار کیا کہ نبی پاک حضور صلی اللہ علیہ وآلہ وسلم سجدہ فرمائیں۔ جب آپ نے سجدہ نہ کیا تو وہ کہنے لگا یا رسول اللہ! کیا اس سورت میں سجدہ نہیں ہے؟ آپ نے فرمایا اس سورت میں سجدہ تو ہے۔ البتہ تم اس بارے میں ہمارے امام تھے۔ اگر تم سجدہ کرتے تو ہم بھی سجدہ کرتے۔ [مصنف ابن ابي شيبه/باب سجود التلاوة/حدیث: 4425]

حضرت سلیم بن حنظلہ کہتے ہیں کہ میں نے حضرت عبد اللہ بن مسعود رضی اللہ عنہ کے پاس سورة بنی اسرائیل پڑھی۔ جب میں آیت سجدہ پر پہنچا تو حضرت عبد اللہ نے فرمایا کہ اسے پڑھو، تم اس میں ہمارے امام ہو۔ [مصنف ابن ابي شيبه/باب سجود التلاوة/حدیث: 4426]

حضرت علقمہ، حضرت اسود، حضرت مسروق اور حضرت عمرو بن شرحبیل فرمایا کرتے تھے کہ اگر سجدہ سورت کے آخر میں ہو تو رکوع کرنا کافی ہے۔ [مصنف ابن ابي شيبه/باب سجود التلاوة/حدیث: 4427]

حضرت ابراہیم فرماتے ہیں کہ جب سجدہ سورت کے آخر میں ہو تو تمہارے لئے رکوع کرنا کافی ہے۔ [مصنف ابن ابي شيبه/باب سجود التلاوة/حدیث: 4428]

حضرت ابن طاوس فرماتے ہیں کہ حضرت طاوس عشاء کی نماز میں سورة تنزیل السجدہ پڑھتے اور سجدے کی جگہ رکوع کیا کرتے تھے۔ [مصنف ابن ابي شيبه/باب سجود التلاوة/حدیث: 4429]

حضرت شعبی سے سوال کیا گیا کہ اگر کوئی شخص ایسی سورت پڑھے جس کے آخر میں سجدۂ تلاوت ہو تو وہ کیا کرے؟ انہوں نے فرمایا کہ اگر چاہے تو سجدہ کرے اور کھڑا ہوکر اس کے بعد کی قراءت کرے اور اگر چاہے تو رکوع کرلے۔ [مصنف ابن ابي شيبه/باب سجود التلاوة/حدیث: 4430]

حضرت عتبہ بن قیس کہتے ہیں کہ حضرت مجاہد سورة بنی اسرائیل کی آیت سجدہ اور اس کے بعد کا کچھ حصہ پڑھا کرتے تھے اور پھر رکوع کرتے تھے۔ [مصنف ابن ابي شيبه/باب سجود التلاوة/حدیث: 4431]

حضرت ربیع بن خثیم فرماتے ہیں کہ اگر سجدہ سورت کے آخر میں ہو تو اگر تم چاہو تو رکوع کرلو اور اگر چاہو تو سجدہ کرلو۔ کیونکہ رکوع سجدے کے ساتھ ہے۔ [مصنف ابن ابي شيبه/باب سجود التلاوة/حدیث: 4432]