یحییٰ فرماتے ہیں کہ کہا جاتا تھا کہ جمعہ، عید الاضحی اور عید الفطر صرف اس کے لئے ہیں جو امام کے ساتھ حاضر ہو۔ [مصنف ابن ابي شيبه/أول العيدين/حدیث: 6009]

حضرت حکم فرماتے ہیں کہ حضرت عمر بن عبد العزیز نے دیہات والوں کو خط لکھا کہ وہ عید الفطر اور عید الاضحی کی نماز پڑھیں اور جمعہ بھی ادا کریں۔ [مصنف ابن ابي شيبه/أول العيدين/حدیث: 6010]

حضرت مکحول فرماتے ہیں کہ جب گاؤں کا کوئی امیر ہو تو ان پر جمعہ لازم ہے۔ [مصنف ابن ابي شيبه/أول العيدين/حدیث: 6011]

حضرت علی بن اقمر رحمہ اللہ فرماتے ہیں کہ حضرت مسروق اور حضرت عروہ بن مغیرہ اپنے ایک دیہی علاقے کی طرف نکلے۔ جب جمعہ کی نماز کا وقت آیا تو انہوں نے جمعہ نہ پڑھا اور جب عید آئی تو انہوں نے عید کی نماز نہ پڑھی۔ [مصنف ابن ابي شيبه/أول العيدين/حدیث: 6012]

حضرت عطاء اور حضرت مجاہد فرماتے ہیں کہ عیدین کی تکبیرات کی اسی طرح قضا کی جائے گی جس طرح نماز کی قضا کی جاتی ہے۔ [مصنف ابن ابي شيبه/أول العيدين/حدیث: 6013]

حضرت عطاء فرماتے ہیں کہ وہ دو رکعتیں پڑھے گا اور تکبیر کہے گا۔ [مصنف ابن ابي شيبه/أول العيدين/حدیث: 6014]

حضرت حماد فرماتے ہیں وہ امام کی نماز کی طرح نماز پڑھے گا اور اس کی تکبیر کی طرح تکبیر کہے گا۔ [مصنف ابن ابي شيبه/أول العيدين/حدیث: 6015]

حضرت انس بن سیرین فرماتے ہیں کہ اسلاف کہا کرتے تھے کہ جب آدمی کو مغرب کی نماز میں شک ہوجائے اور وہ اسے دوبارہ پڑھنا چاہے تو وہ ایک رکعت کو ملا کردو پوری کرے اور پھر تین رکعت نماز پڑھے۔ [مصنف ابن ابي شيبه/أول العيدين/حدیث: 6016]

حضرت قاسم سے بھی یونہی منقول ہے۔ [مصنف ابن ابي شيبه/أول العيدين/حدیث: 6017]

حضرت ہلال بن یساف کہتے ہیں کہ زیاد بن ابی جعد نے میرا ہاتھ پکڑا اور مجھے رقہ میں ایک بوڑھے صاحب کے پاس لا کھڑا کیا جن کا نام وابصہ بن معبد تھا۔ انہوں نے فرمایا کہ ایک آدمی نے صف کے پیچھے اکیلے نماز پڑھی تو حضور صلی اللہ علیہ وآلہ وسلم نے اسے نماز لوٹانے کا حکم دیا۔ [مصنف ابن ابي شيبه/أول العيدين/حدیث: 6018]