حضرت سعید بن مسیب فرماتے ہیں کہ وہ نماز جس کے بارے میں حضور صلی اللہ علیہ وآلہ وسلم کا ارادہ تھا کہ اس سے پیچھے رہنے والوں کو جلا دیں، عشاء کی نماز تھی۔ [مصنف ابن ابي شيبه/أول العيدين/حدیث: 5999]

حضرت حسن فرماتے ہیں کہ وہ نماز جس کے بارے میں حضور صلی اللہ علیہ وآلہ وسلم کا ارادہ تھا کہ اس سے پیچھے رہنے والوں کو جلا دیں وہ جمعہ کی نماز تھی۔ [مصنف ابن ابي شيبه/أول العيدين/حدیث: 6000]

حضرت ابوہریرہ کی روایت میں ہے کہ نبی کریم صلی اللہ علیہ وسلم نے فرمایا کہ وہ عشاء یا فجر کی نماز ہے۔ [مصنف ابن ابي شيبه/أول العيدين/حدیث: 6001]

حضرت عبد اللہ سے روایت ہے کہ حضور صلی اللہ علیہ وآلہ وسلم نے ارشاد فرمایا کہ وہ جمعہ کی نماز ہے۔ [مصنف ابن ابي شيبه/أول العيدين/حدیث: 6002]

حضرت ابن عون فرماتے ہیں کہ میں نے حضرت نافع کو خط لکھا اور ان سے ان لوگوں کے بارے میں پوچھا جو کسی دیہی علاقے میں ہوں اور عید آجائے کہ کیا وہ عید کی نماز اور جمعہ کی نماز کے لئے جمع ہوں گے اور کیا کوئی آدمی انہیں یہ نمازیں پڑھائے گا؟ انہوں نے جواب میں مجھے لکھا کہ عید کی نماز کے لئے تو وہ جمع ہوں گے اور ایک آدمی انہیں عید کی نماز پڑھائے گا اور جمعہ کی نماز کے بارے میں مجھے کوئی علم نہیں۔ [مصنف ابن ابي شيبه/أول العيدين/حدیث: 6003]

حضرت عکرمہ فرماتے ہیں کہ کچھ لوگ عید الفطر یا عید الاضحی کے دن اگر سفر میں ہوں یا دیہات میں ہوں تو وہ جمع ہو کر نماز پڑھیں گے اور ایک آدمی انہیں نماز پڑھائے گا۔ [مصنف ابن ابي شيبه/أول العيدين/حدیث: 6004]

حضرت حسن بستی والوں کے بارے میں فرماتے ہیں کہ وہ عید کی نماز کے لئے نہیں نکلیں گے اور نہ ہی کوئی انہیں عید کی نماز پڑھائے گا۔ [مصنف ابن ابي شيبه/أول العيدين/حدیث: 6005]

حضرت یحییٰ بن ابی کثیر فرماتے ہیں کہ اس بارے میں حضرت عطاء بن ابی رباح سے سوال کیا گیا تو انہوں نے فرمایا کہ جب گاؤں جامعہ ہو تو وہ جمعہ کی طرح دو رکعات پڑھیں۔ [مصنف ابن ابي شيبه/أول العيدين/حدیث: 6006]

یحییٰ فرماتے ہیں کہ حضرت حکم بن عتیبہ سے سوال کیا گیا تو انہوں نے فرمایا کہ جمعہ امام کے ساتھ جامع مسجد میں ہی ہوتا ہے۔ [مصنف ابن ابي شيبه/أول العيدين/حدیث: 6007]

یحییٰ فرماتے ہیں کہ حضرت قتادہ نے فرمایا کہ میرے علم کے مطابق جمعہ حاکم وقت کے ساتھ مسلمانوں کے شہروں میں ہی ہوتا ہے۔ [مصنف ابن ابي شيبه/أول العيدين/حدیث: 6008]