حضرت ابراہیم فرماتے ہیں کہ افطار میں جلدی کرنا سنت ہے۔ [مصنف ابن ابي شيبه/كتاب الصيام/حدیث: 9201]

حضرت موسیٰ بن انس رحمہ اللہ فرماتے ہیں کہ حضرت انس ایک باندی کو گھر کے اوپر چڑھاتے اور اس سے فرماتے کہ جب افق برابر ہوجائے تو مجھے بتادینا۔ [مصنف ابن ابي شيبه/كتاب الصيام/حدیث: 9202]

حضرت ابو الدرداء فرماتے ہیں کہ تین چیزیں نبیوں کی عادات میں سے ہیں: افطار میں جلدی کرنا، سحری میں تاخیرکرنا، نماز میں دائیں ہاتھ کو بائیں ہاتھ پر رکھنا۔ [مصنف ابن ابي شيبه/كتاب الصيام/حدیث: 9203]

حضرت قیس فرماتے ہیں کہ جب سورج غروب ہوگیا تو حضرت عمر نے اپنے پہلو میں موجود ایک آدمی کو پانی کا برتن پکڑایا اور فرمایا کہ اسے پی لو۔ پھر فرمایا کہ شاید تم ان لوگوں میں سے ہو جو 'ابھی کرتا ہوں، ابھی کرتا ہوں' کہہ کر افطاری میں تاخیر کرتے ہیں۔ [مصنف ابن ابي شيبه/كتاب الصيام/حدیث: 9204]

حضرت کعب بن عاصم سے روایت ہے کہ رسول اللہ صلی اللہ علیہ وآلہ وسلم نے فرمایا کہ سفر میں روزہ رکھنا نیکی نہیں۔ [مصنف ابن ابي شيبه/كتاب الصيام/حدیث: 9205]

حضرت جابر بن عبد اللہ رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم ایک سفر میں تھے، اس سفر میں ایک آدمی کو دیکھا جس پر لوگ جمع تھے اور اس پر سایہ کیا گیا تھا، آپ صلی اللہ علیہ وآلہ وسلم نے فرمایا اس کو کیا ہوا ہے؟ لوگوں نے بتایا کہ یہ روزہ دار ہے آپ صلی اللہ علیہ وآلہ وسلم نے فرمایا کہ سفر میں روزہ رکھنا نیکی نہیں ہے۔ [مصنف ابن ابي شيبه/كتاب الصيام/حدیث: 9206]

حضرت انس رضی اللہ عنہ فرماتے ہیں کہ ہم ایک سفر میں حضور صلی اللہ علیہ وآلہ وسلم کے ساتھ تھے، کچھ لوگوں کا روزہ تھا اور کچھ لوگوں کا روزہ نہ تھا۔ جن لوگوں کا روزہ نہیں تھا انہوں نے خیمے لگائے اور سواریوں کو پانی پلایا۔ اس پر نبی کریم صلی اللہ علیہ وآلہ وسلم نے فرمایا کہ آج روزہ نہ رکھنے والے اجر کے اعتبار سے آگے بڑھ گئے۔ [مصنف ابن ابي شيبه/كتاب الصيام/حدیث: 9207]

حضرت ابوسلمہ بن عبدا لرحمن اپنے والد سے روایت کرتے ہیں کہ سفر میں روزہ رکھنے والا حضر میں روزہ نہ رکھنے والے کی طرح ہے۔ [مصنف ابن ابي شيبه/كتاب الصيام/حدیث: 9208]

حضرت ابو جمرہ کہتے ہیں کہ میں نے حضرت عبد اللہ بن عباس رضی اللہ عنہما سے سفر میں روزہ کے بارے میں سوال کیا تو انہوں نے فرمایا کہ ایک مشکل چیز ہوتی ہے اور ایک آسان۔ اللہ نے تمہیں جو آسانی دی ہے اسے قبول کرو۔ [مصنف ابن ابي شيبه/كتاب الصيام/حدیث: 9209]

حضرت زکریا فرماتے ہیں کہ حضرت عامر سفر میں روزہ نہیں رکھا کرتے تھے۔ [مصنف ابن ابي شيبه/كتاب الصيام/حدیث: 9210]