حضرت علی رضی اللہ عنہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: دو سو دراہم سے کم میں (زکوٰۃ) نہیں ہے۔ [مصنف ابن ابي شيبه/كتاب الزكاة/حدیث: 10124]

حضرت داؤد فرماتے ہیں کہ امام شعبی دو سو دراہم سے زائد پر کچھ بھی واجب نہیں سمجھتے تھے یہاں تک کہ وہ چالیس تک پہنچ جائے۔ [مصنف ابن ابي شيبه/كتاب الزكاة/حدیث: 10125]

حضرت حسن فرماتے ہیں کہ حضرت عمر نے حضرت ابو موسیٰ اشعری کو لکھا تھا کہ: دو سو دراہم سے زائد ہوجائیں تو پھر ہر چالیس دراہم پر ایک درھم (زکوٰۃ) ہے۔ [مصنف ابن ابي شيبه/كتاب الزكاة/حدیث: 10126]

حضرت حسن فرماتے ہیں کہ دو سو دراہم سے زائد پر کچھ نہیں آئے گا یہاں تک کہ وہ چالیس ہوجائیں۔ [مصنف ابن ابي شيبه/كتاب الزكاة/حدیث: 10127]

حضرت مکحول فرماتے ہیں کہ دو سو دراہم سے زائد پر کچھ نہیں آئیگا یہاں تک کہ وہ زائد چالیس ہوجائیں۔ [مصنف ابن ابي شيبه/كتاب الزكاة/حدیث: 10128]

حضرت عطاء فرماتے ہیں کہ یہاں تک کہ دو سو سے زائد چالیس درہم ہوجائیں تو پھر اس پر چھ درہم (زکوٰۃ) ہے پھر کچھ نہیں ہے یہاں تک کہ ان کی تعداد دو سو اسی ہوجائیں تو ان پر سات درھم (زکوٰۃ) ہیں، پھر اسی طرح حساب کرتے جائیں۔ [مصنف ابن ابي شيبه/كتاب الزكاة/حدیث: 10129]

حضرت علی رضی اللہ عنہارشاد فرماتے ہیں کہ دو سو دراہم سے کم میں زکوٰۃ نہیں ہے اور جو اس پر زائد ہو اس پر اسی حساب سے زکوٰۃ آئے گی۔ [مصنف ابن ابي شيبه/كتاب الزكاة/حدیث: 10130]

حضرت جابر الحذاء جو بنی مجاشع کے غلام تھے سے مروی ہے کہ حضرت ابن عمر رضی اللہ عنہما نے ارشاد فرمایا: دو سو سے زائد جتنے درھم ہوجائیں ان پر اسی حساب سے زکوٰۃ آئے گی۔ [مصنف ابن ابي شيبه/كتاب الزكاة/حدیث: 10131]

حضرت ابراہیم فرماتے ہیں کہ دو سو دراہم سے جتنے زائد ہوجائیں ان پر اسی حساب سے زکوٰۃ آئے گی۔ [مصنف ابن ابي شيبه/كتاب الزكاة/حدیث: 10132]

حضرت ابن سیرین فرماتے ہیں کہ: (دو سو سے زائد دراہم پر) اسی کے حساب سے زکوٰۃ آئے گی۔ [مصنف ابن ابي شيبه/كتاب الزكاة/حدیث: 10133]