حضرت حارث سے مروی ہے کہ حضرت علی رضی اللہ عنہ کرم اللہ وجہہ نے ارشاد فرمایا: زکوٰۃ ادا نہ کرنے والے پر لعنت کی گئی ہے۔ [مصنف ابن ابي شيبه/كتاب الزكاة/حدیث: 10094]

حضرت حارث نے حضرت علی رضی اللہ عنہ کرم اللہ وجہہ سے اسی طرح کا قول نقل کیا ہے۔ [مصنف ابن ابي شيبه/كتاب الزكاة/حدیث: 10095]

حضرت حارث بن عبد اللہ حضرت عبد اللہ بن مسعود رضی اللہ عنہ سے نقل فرماتے ہیں کہ زکوٰۃ ادا نہ کرنے والے قیامت کے دن ملعون ہوں گے محمد (صلی اللہ علیہ وآلہ وسلم) کی زبان پر۔ [مصنف ابن ابي شيبه/كتاب الزكاة/حدیث: 10096]

حضرت مثنی بن سعید فرماتے ہیں کہ میں نے سنا حضرت انس سے کہ دیہاتیوں کی ایک قوم نے ان سے زکوٰۃ کے بارے میں شکایت کی تو حضرت انس نے فرمایا تم زکوٰۃ کو اکٹھا کرو اور اس کے وقت میں ادا کرو پس جو کچھ اس کے بعد تم سے لیا گیا وہ ظلم ہے جو تم پر کیا گیا۔ [مصنف ابن ابي شيبه/كتاب الزكاة/حدیث: 10097]

حضرت جریر فرماتے ہیں کہ میں نے اپنے بیٹوں سے کہا: اے بیٹو! جب تمہارے پاس زکوٰۃ وصول کرنے والا آئے تو اس سے اپنے اموال میں سے کوئی چیز بھی نہ چھپانا۔ [مصنف ابن ابي شيبه/كتاب الزكاة/حدیث: 10098]

حضرت ابو عثمان سے مروی ہے کہ حضرت ابوہریرہ نے ارشاد فرمایا: جب زکوٰۃ وصول کرنے والا تمہارے پاس آ کر کہے کہ اپنی زکوٰۃ نکالو تو تمہیں چاہئے کہ تم (فورا) زکوٰۃ نکال لو اور اگر وہ اسکو قبول کرلے تو بہت اچھا ہے اور اگر وہ انکار کر دے تو تو اپنی پیٹھ اس سے پھیر لے اور اس سے بحث نہ کر اور یوں کہہ: اے اللہ! میں تجھ سے ثواب کی امید رکھتا ہوں جو اس نے مجھ سے وصول کیا، اور اس شخص کو لعن طعن نہ کر۔ [مصنف ابن ابي شيبه/كتاب الزكاة/حدیث: 10099]

حضرت جریر سے مروی ہے کہ حضور صلی اللہ علیہ وآلہ وسلم نے ارشاد فرمایا: زکوٰۃ وصول کرنے والا جب تمہارے پاس سے لوٹے تو وہ اس حال میں لوٹے کہ وہ تم سے راضی ہو۔
حضرت شعبی فرماتے ہیں کہ زکوٰۃ (وصول کرنے) میں زیادتی کرنے والا زکوٰۃ روکنے والے کی طرح ہے۔ [مصنف ابن ابي شيبه/كتاب الزكاة/حدیث: 10100]

حضرت عبد الرحمن بن جابر بن عبد اللہ اپنے والد حضرت جابر رضی اللہ عنہ سے روایت کرتے ہیں کہ نبی کریم صلی اللہ علیہ وآلہ وسلم نے ارشاد فرمایا: عنقریب تمہارے پاس ناپسندیدہ سوار آئیں گے، لیکن جب وہ تمہارے پاس (زکوٰۃ وصول کرنے کیلئے) آئیں تو تم انکو خوش آمدید کہو اور ان کیلئے کشادگی کرو، اور چھوڑ دو ان کے درمیان اور اس چیز کے درمیان جو وہ طلب کریں، پس اگر وہ انصاف کریں گے تو اپنے نفسوں کیلئے اور اگر ظلم کریں تو انکا وبال خود ان پر ہے اور تمہیں چاہئے کہ تم ان کو راضی کردو بیشک تمہاری زکوٰۃ کا اتمام (مکمل ہونا) ان کی رضا مندی ہے اور ان کو بھی چاہئے کہ وہ تمہارے لئے دعا کریں۔ [مصنف ابن ابي شيبه/كتاب الزكاة/حدیث: 10101]

حضرت ضحاک فرماتے ہیں کہ حضرت عمر بن خطاب کو جب معلوم ہوتا کہ (فلاں) مال چھپایا گیا ہے زکوٰۃ سے تو وہ اسکا پانچواں حصہ (خمس) وصول فرماتے۔ [مصنف ابن ابي شيبه/كتاب الزكاة/حدیث: 10102]

حضرت عبید اللہ بن رزیق فرماتے ہیں کہ میں نے حضرت حسن سے سنا وہ فرماتے ہیں کہ حضور صلی اللہ علیہ وآلہ وسلم نے ارشاد فرمایا: جس شخص نے اپنے مال کی زکوٰۃ ادا کردی اس نے اپنا حق جو اس پر تھا ادا کردیا اور جو شخص زیادہ ادا کرے تو وہ اس کیلئے بہتر ہے (اس زیادہ دینے کا اسی کو ثواب ہے)۔ [مصنف ابن ابي شيبه/كتاب الزكاة/حدیث: 10103]