حضرت امام شعبی فرماتے ہیں کہ ایک ہی زمین سے خراج اور عشر وصول نہیں کیا جائے گا۔ [مصنف ابن ابي شيبه/كتاب الزكاة/حدیث: 10914]

حضرت عکرمہ فرماتے ہیں کہ خراج اور عشر ایک مال میں جمع نہیں کئے جائیں گے۔ [مصنف ابن ابي شيبه/كتاب الزكاة/حدیث: 10915]

حضرت ابوحنیفہ فرماتے ہیں کہ ایک ہی شخص پر خراج اور زکوٰۃ کو جمع نہیں کیا جائے گا۔ [مصنف ابن ابي شيبه/كتاب الزكاة/حدیث: 10916]

حضرت عاصم بن محمد فرماتے ہیں کہ اللہ تعالیٰ کے قول { وَالَّذِینَ فِی أَمْوَالِہِمْ حَقٌّ مَعْلُومٌ} سے مراد زکوٰۃ ہے۔ [مصنف ابن ابي شيبه/كتاب الزكاة/حدیث: 10917]

حسن فرماتے ہیں کہ اللہ تعالیٰ کے قول { وَالَّذِینَ فِی أَمْوَالِہِمْ حَقٌّ مَعْلُومٌ} سے مراد فرض زکوٰۃ ہے۔ [مصنف ابن ابي شيبه/كتاب الزكاة/حدیث: 10918]

ابراہیم فرماتے ہیں کہ لوگوں کا معمول تھا کہ جب ان کے عطیات (وظائف) نکلتے تو وہ ان میں سے صدقہ کرتے۔ [مصنف ابن ابي شيبه/كتاب الزكاة/حدیث: 10919]

حضرت عمرو بن میمون فرماتے ہیں کہ ولید بن عبد الملک نے اہل رقہ میں سے ایک شخص جس کی کنیت ابوعائشہ تھی اس کے بیس ہزار (درہم) لیے اور بیت المال میں داخل کردیئے۔ پھر جب حضرت عمر بن عبد العزیز خلیفہ بنے اس کی اولاد آپ کے پاس آئی اور اپنی مظلومیت کی داستان آپ تک پہنچائی۔ آپ نے میمون کو لکھا کہ ان کا مال ان کو واپس لوٹا دو اور اس سال کی زکوٰۃ بھی وصول کرلو۔ اگر یہ مال ضمار (وہ مال اور قرض جس کے واپس ملنے کی امید نہ ہو) نہ ہوتا تو ہم گزرے ہوئے سالوں کی زکوٰۃ بھی وصول کرتے۔ [مصنف ابن ابي شيبه/كتاب الزكاة/حدیث: 10920]

حضرت میمون سے مروی ہے کہ ایک شخص کا مال بعض مظالم کی وجہ سے اس سے لے کر بیت المال میں داخل کردیا گیا۔ جب حضرت عمر بن عبد العزیز خلیفہ بنے، تو یہ معاملہ آپ تک پہنچایا گیا، حضرت عمر بن عبد العزیز نے لکھا اس کا مال اس کو واپس کردو اور گذرے ہوئے سالوں کی زکوٰۃ بھی وصول کرلو پھر اس کے بعد دوبارہ لکھا کہ اس کا مال اس کو واپس کردو اور اس کی زکوٰۃ اس سال کی وصول کرلو کیونکہ یہ ایسا مال ہے جس کی واپسی کی امید نہ تھی۔ [مصنف ابن ابي شيبه/كتاب الزكاة/حدیث: 10921]

حسن فرماتے ہیں کہ اس پر اسی سال کی زکوٰۃ ہے۔ [مصنف ابن ابي شيبه/كتاب الزكاة/حدیث: 10922]

حضرت عبد اللہ رضی اللہ عنہ اللہ تعالیٰ کے ارشاد { وَیَمْنَعُونَ الْمَاعُونَ } کے بارے میں فرماتے ہیں کہ اس سے مراد وہ چیزیں ہیں جو لوگ آپس میں ایک دوسرے کو عاریۃ دیتے ہیں، جیسے کدال، دیگچی، ڈول اور اس جیسی اشیاء۔ [مصنف ابن ابي شيبه/كتاب الزكاة/حدیث: 10923]